ما زال المغاربة ما سالاوش مع صحاب الرقية الشرعية والمعالجين الروحانيين اللي رجعو كثر من المرضى فالمغرب، حتى خرج نوع جديد سميتو “معالج رباني”، والوحيد اللي عندو هاد التخصص العجيب هو الحاضي المختار فتطوان.
هاد السيد كان تشهر ف2017 من بعد ما خرجات ورقة على شكل تشخيص طبي كيقول فيها الأمراض اللي عند واحد السيدة كانت عندو، وهاد الأمراض اللي كتب، خاصها طبيب مختص، ولكن المعالج الرباني كيف كيسمي راسو قدر يعرفهم.
المختار الحاضي عاود بان هاد العام، وخرجات ورقة جديدة فيها التوقيع ديالو، فتاريخ 29 يوليوز اللي فات، وكاتب فيها تشخيص لواحد المريض جا عندو، وبعيدا على الأخطاء اللغوية اللي دار، السيد مطلع النيفو ديالو بصاح، حيث من بعد التشخيص “الدقيق” اللي دار للأمراض المعدية وفقر الدم، كتب للمريض اللي زارو، أن خصو يتابع الدوا اللي غادي يعطيه الطبيب المختص، بمعنى بلا ما يمشي يشوف شي معالج رباني آخر!
موقع “كيفاش” حاول يتصل بالحاضي، باش يوضح كيفاش كيدير لهاد التشخيص، وهو ما عندو حتى شهادة فالطب، ولكن “المعالج الرباني” كان فالجامع وجاوب فالتلفون، وقال باللي راه كيصلي وما يقدرش يهضر، ومن بعد ما بقاش بغى يجاوب على الاتصالات الآخرين.