محمد محلا
شد ليا نقطع ليك بين الشيخ عبد الله النهاري والمخرج محسن البصري. النهاري يقول إن الفيلم الجديد لمحسن البصري “المغضوب عليهم” يهاجم الدين الإسلامي، والمخرج ينفي ما لفق له من اتهامات ويقول إنه يدافع عن الإسلام ويفتح النقاش.
محسن البصري، الذي حل ضيفا على برنامج “كيفاش” على ميد راديو اليوم الجمعة (1 مارس)، قال إن النهاري كذاب وحشوما عليه يكذب وهو شيخ وداعية.
قالو لينا باللي راك مغضوب عليك، ياك ما الجزء الثاني من الفيلم ديالك هادا اللي غادي يخرج اليوم؟
داك الشي اللي كيعاودو آ خويا.
مالك معاهم؟
والواحد كيهضر بلا ما يشوف. حنا مغضوب علينا كاملين يلا بقينا في هاد المسألة.
الشيخ النهاري قال، والتقليد عليه، باللي الفيلم ديالك كيهاجم الإسلام، وحرفتي الدين الإسلامي، وكتصور الإسلاميين إرهابيين، وزيد وزيد، هاد الاتهامات راه خطيرة؟
هادي ماشي اتهامات هذا كذب، ويلا قال راني كنحرف خاصو على الأقل يتفرج في الفيلم، وهاداك السيد كيكذب، ويلا ما بغاش يعترف بيها في هاد الدار غادي نتلاقاو في الدار الآخرة عند سيدي ربي، وديك الساعة غادي نتحاسبو.
واش عرضتي عليه يشوف الفيلم ديالك؟
أنا عرضت عليه ورسلت ليه من خلال الجرائد باش يجي يتفرج في الفيلم، ويقول الرأي ديالو بكل حرية، غير يهضر على شي حاجة شافها، أما باش يتهمني ويكذب في حقي ويقول أنني درت شي حاجة بلا ما شافها فهذا كذب والكذب حرام وبالنسبة ليه هو خاص يكون عارف هاد المسألة.
واش رد علي؟
لا ما ردش عليا، حيت وقيلا عارف راسو كذب ما بغاش يرد.
ولكن كلام النهاري داز عليه عام آش فكركم بكلامو؟
هادي عام باش تقال داك الشي، وشفت الفيديو، وطراو ليا المشاكل، وشي ناس في العائلة ما بغاوش يشوفو الفيلم حيت سمعو ما قال النهاري. هاد السيد خاص يعرف آثار كلامه على الشخص المعني، هو كذب عليا وقال أنني حرفت، والفيلم ديالي كيدافع على الإسلام، ورجل الدين ما خاصوش يكذب.
وقيلا خاصك تشكر النهاري وتقسم معاه المداخيل راه دار ليك دعاية مجانية للفيلم؟
ما عرفتها واش دعاية أو لا. ما عرفناش واش الناس ما غادينش يشوفو الفيلم، ولا يشوفوه ويحكمو عليه، أنا مكرهتوش يجي ونشربو براد ديال أتاي ويتفرج في الفيلم ونتناقشو، حيت الفيلم دعوة للحوار ماشي عكس ذلك.
