محمد المبارك
ليس بمحتوى خارق، ولا معلومات حصرية، ولا علم ينتفع به، لكن حسن بن يحيى هو الحساب الأكثر متابعة في المغرب، بعدد يتجاوز 402 ألف متابع. شاب استطاع خلق الجدل على مواقع التواصل الاجتماعي، والفيديوهات ديالو كتوصل للملايين ديال المشاهدات على يوتيوب، ببرنامج فايسبوكي خاص وماشي بحالهم.
حسن بن يحيى، الملقب ب”ماريو”، تزاد في الرباط سنة 1991. حاليا هو طالب بمعهد فرنسي خاص للصحافة والإعلام، حياته ما كتنتش مليئة بالأحداث، لعل أهم حدث كان فحياتو هو زواجه بسويسرية في سن 18 سنة، وطلق منها بعد 3 سنوات بسبب رفض الأم ديالو ليها.
بالنسبة للفايس بوك، حسن كان مستعمل عادي ديال، ولكن في سنة 2014 غتدي يقرر، هو ومجموعة ديال الأصدقاء ديالو، يديرو صفحة لاول مرة كتكتب بالدارجة المغربية، تحت عنوان “شارلي بالدارجة”، وبداو كيهضرو على الحريات الفردية ومواضيع تعتبر في المجتمع المغربي من الطابوهات.
سنة 2017، الصفحة ديال “شارلي بالدارجة” غدي يسدها الفايس ، بسبب “السينيال”، ولكن ماريو غادي يرجع يتفاعل في الحساب الشخصي ديالو، وواحد نهار هضر على غشاء البكارة، على أساس أنه ماشي هو الشرف، وخلق الجدل وبداو كيسبوه، فقال ماريو باللي غدي يدير لايف ردا على هاد الناس.
في نفس اليوم، دار ماريو “لايف”، بداو الناس كيدخلو عندو، وكيتصلو بيه عبر الهاتف، واللايف وصل مئات المشاهدين، وهنا غادي تجي فكرة “ليالي ماريو”.
بدا حسن كيدير هاد “ليالي ماريو” تقريبا كل يوم، ودائما يتطرق لمواضيع اللي حتى راديو ولا تلفزيون مغربي ما يقدرش يهضر فيه بديك الطريقة، لأن المواضيع أغلبها طابوهات، وحتى اللغة المستعملة قبيحة وفيها كلام بذيء.
طلعو عدد المتابعين وحتى عدد المشاهدات اللي وصلوا فواحد ليلة 50 الف مشاهد آني، و9 ملايين مشاهدة، وكان الموضوع “الرغبات الجنسية عند المغاربة”. وبعد منو جا لايف آخر بعنوان “أسوأ حالات الاغتصاب”، اللي وصل 40 ألف مشاهدة، وأيضا ولة كيدير حوارات مع ضيوف دايرين البوز فمواقع التواصل الاجتماعي، وكاين اللي بعد من اللايف ديال ماريو غبر ليهم الأثر!
هاد الشي جبد على حسن انتقادات كثار، وخاصة من الناس “المحافظين”، واللي سماهم “حراس الفضيلة”، اللي كيقولو باللي ماريو والأشباه ديالو هوما سبب الانحلال الأخلاقي، كانوا رفعو عليه دعوى بخصوص هذا البرنامج الفايسبوكي.
في سنة 2018، حسن غادي ينقص من “اللايفات”، وحسب ما قال، عندو التزامات بحكم السنة الأخيرة في الدراسة، ولكن بقى متابع للأحداث اللي واقعة فالبلاد ، وحتى العديد من المتابعين ديالو كيتعبرو الحساب ديالو منبر باش يوصلو الفكرة ديالهم، حيث يكفي تكتب تعليق عند ماريو يكون هادف أو فيه شي حاجة متميزة، حتى تلقى راسك كلشي كيهضر عليك!!
