أحسن حاجة كتعجيني ملي وليت رئيس حكومة، وهذا من فضل ربي، هي هاد منتدى دافوس، على الأقل ما كنلقاش فيه بنشماش ودعيدعة والراضي، كنلقى غير شي وحدين من منظمات عالمية كنقدر نغمق عليهم بداك الشوية ديال تخراج العينين وجوج كليمات بالإنجليزية.
غير هو هاد المرة شداتني الحماسية شوية وخرجت عيني في الأوروبيين ولكن راه عندي أسبابي. راه التماسيح والعفاريت ما خطات حتى بلاد، ودوك اللي قلت ليهم يلا عجب هاد الشي الأوربيين مرحبا ويلا ما عجبهمش على راحتهم، راهم غير شي تماسيح في بلاد الكفار خرجت فيهم عينيا باش يحشمو.
آيه راه متافق معاكم ما خصنيش نضور في الأوروبيين حيت هوما اللي كيجيبو لينا الاستثمار وحنا في أزمة وهوما اللي كيعاونونا فشي قضايا حساسة وكنتسلفو من عندهم وكتجينا من عندهم العملة الصعبة والجالية ديالنا عندهم، ولكن راه منقدرش نسد فهمي بحالي بحال الناس، وما نضورش في شي واحد واخا يكون باراك أوباما باباه.
دو يو أندرستند مي أور نوت؟ فهمتيني ولا لا؟
