المدرسة مؤسسة تعليمية عندها الحرمة ديالها، ولكن كاينين اللي ما عندهمش هاد الاعتبارات كيشوفوها بحال أي مبنى. كيفاش؟
يوم أمس الأحد (23 شتنبر)، أحد سكان منطقة حي أولاد بوطيب الفوقاني، نواحي الناظور، ما لقى فين يربط البغل ديالو وهو يختار باب المدرسة كأنسب مكان.
هاد المدرسة اللي ناض عليها صداع كبير باش تقادات للتخفيف على المدرسة الأولى في المنطقة واللي كانت كتعاني الاكتظاظ. مول البغل ما عطاش قيمة للمدرسة ولا للحرمة ديالها وربطو مع الباب ومشا يقضي الأغراض ديالو.
هاد الشي بحال ديال الناس اللي كيخليو المراحيض العمومية وكيختارو يقضيو حاجتهم حدا حيطان المدارس، أو بعض “المشرملين” اللي كيدخلوا للأقسام وكيرجعوا منها “براتش” فين يشربو ويكميو الحشيش.
