تركي آل شيخ، رئيس الهيأة العامة للرياضة في السعودية، ما عارفش باللي المغاربة ما كينساوش دغيا، وماشي ساهل يدوزوها لشي واحد غلط معاهم. كيفاش؟
البارح الخميس (27 شتنبر) تركي آل شيخ، كتب تدوينة كيقول فيها باللي كيدعم المغرب فالتنظيم ديال كأس إفريقيا 2019، وباللي مستعد يعاون بأي حاجة، وكيقدم راسو كرئيس الاتحاد العربي لكرة القدم في رسالة ضمنية كيحاول يقول فيها باللي راه هو ودول عربية أخرى في صف المغرب.
ولكن بعض المعلقين المغاربة لقاو هادي فرصة باش يرجعوا الصرف لآل شيخ من بعد التصريحات ديالو اللي كان كيقول تزامنا مع ترشيح المغرب لاحتضان كأس العالم 2026، والحملة اللي دار لدعم الملف الأمريكي.
ومن التعليقات على التدوينة ديال تركي آل شيخ، قال أحد النشطاء: “المغرب عطيه التيساع، بزاف عليك هاد البلاد، واتحاد العرب ديالكم لا علاقة له بأفريقيا، فلوسك خداهم ترامب للحملة لكأس العالم”.
وقال آخر ساخرا: “حتى جات كأس إفريقيا عاد جاي تسول فيا، منين كان كأس العالم فين كنتي ونتيا”.
