محمد محلا
من المتوقع أن ينتقل المهاجم عبد المالك أفرياط، عضو الفريق الفيدرالي في مجلس المستشارين، إلى فريق برشلونة الإسباني، في فترة الانتقالات المقبلة، بعد أن شبه نفسه بليونيل ميسي، خلال جلسة في مجلس المستشارين، خصصت لتدارس واقع كرة القدم.
أفرياط، في برنامج “كيفاش” الذي بث على ميد راديو، اليوم الجمعة (22 فبراير)، قال باللي هو ميسي السياسة في مجلس المستشارين، ويتمنى أن يحضر على الفاسي الفهري، رئيس الجامعة الملكية لكرة القدم، المرة المقبلة لرد البيلانتيات اللي يمكن يتمراكو عليه.
خليتي النقابة ووليتي كتهضر على الكرة، وقلتي باللي أنت كنت أحسن من ميسي؟ وااا فشكل هاد القضية؟
هذا افتراء مع الأسف، ولكن علاش لا؟ مال ميسي ماشي بشر، ممكن نكون ميسي ديال المغرب.
في المنتخب أو في شي فريق؟
وا في سياسة، ما كاينش غير الكرة، راه تقدر تكون ميسي حتى في السياسة.
بيناتنا واش اللي شافك يقول عندك فورمة ديال الكرة؟
دابا كتعرف ديك القضية ديال داك التونسي اللي قال: “هرمنا هرمنا”، ولكن يلا مشات الصحة يبقى الفانت، ويلا قلتي شي حاجة جيب ليا شي بالون وشوف واش ما نجانكليش بيه واحد الساعة.
قالو لينا كنت كوايري ملي كنتي صغير؟
فعلا كنت كوايري، وفي الحي ديالنا كنت واعر، ولعبت مع الرجاء البيضاوي في المينيم، ولكن ما طولتش بزاف، ولعبت مع فريق المهني ديال المؤسسة التي اشتغلت فيها.
ويلا ما كنتيش ميسي ديال الرياضة وقيلا راك ميسي ديال مجلس المستشارين، حيت سجلتي واحد الهدف على جامعة كرة القدم. كيفاش درتي ليها؟
فعلا خاص يلا كنتي راسك راس البوطو وكنتي كوايري ما خصكش تضيع الهدف.
وكيفاش ماركيتي عليهم؟
ماركيت عليه لأنه البوطو كان خاوي ما جاش علي الفاسي الفهري، رئيس الجامعة الملكة لكرة القدم، وقلنا كيفاش هاد السيد واش عندو شي قوة أكثر من الدستور باش ما يجيش يجاوبنا على الاختلالات اللي كتعرفها الجامعة، وعلى إخفاق الفريق الوطني؟ وقلنا راه حنا ما كنفهموش كيفاش واحد السيد مسؤول عن الكرة والما والضو؟ وخا يكون عندو الدماغ ديال أينشتين. وقلنا بان تعدد المهام كتكون النتيجة ديالو صفر، لذلك لقيت البوطو خاوي وسجلت الهدف الذي هي الاحتجاج.
مبروك الإصابة.
الله يبارك فيك، نتمنى يحضر هاد المرة ويرد البلانتيات اللي يمكن يتمراكو عليه.
