محمد المبارك
يوسف الزروالي من بعد حلقة “قفص الاتهام” اللي استضافو فيها الإعلامي رضوان الرمضاني في إذاعة “ميد راديو”، واللي بقى كيأكد فيها على الدلائل وكيقول “خاصني دلائل، وجيبو ليا الطومبو ديال وزارة العدل”، ونفى أنه تشكى منو شي واحد، خرجو العديد من الأشخاص بفيديوهات كيأكدوا أنه بصح كاينين شكايات ضد “فاعل الخير”.
“مول العشبة” جبد أزيد من عشر شكايات
من بعد برنامج “قفص الاتهام”، محمد زين الدين دار فيديو على الصفحة الشخصية ديالو في الفايس، وبين عدد من الشكايات اللي كاينة ضد يوسف الزروالي، وقال حتى الجهات اللي ترسلات ليها هاد الرسائل. كذلك علق على الحلقة، وقال أن يوسف حاول يجبد المقاطعة باش يقلب الموضوع ويدوّر “الصمطة” على الرمضاني.
مهاجرة تتهم يوسف بالنصب والتهديد
زكية المغربية، اللي عايشة في فرنسا، واللي كانت من قبل دارت فيديو تتهم يوسف الزروالي بالنصب، خرجت مرة ثانية ودارت فيديو كتشرح فيه الشكايات اللي كاينين، وعاودات كيفاش تم النصب عليها من طرف الزروالي، حسب تعبيرها، وكتقول باللي كتتعرض لتهديدات من طرف أشخاص يلا دخلات للمغرب، وأنها كذلك دافعة شكاية ضدو.
