من نهار المملكة المغربية دارت استئناف العلاقات مع إسرائيل، وشي “سمايرية” كيقلبو غير منين يروجو نظرية المؤامرة ديالهم. وما كاين غير جيب يا فم وگول، وأخرها هي قصة واحد الإسرائيلي رجعوه حاط السيارة ديالو فبلاصة ممنوعة وكيستقوى على الناس بالجنسية.
شنو القصة؟
نهار الاثنين اللي فات (8 غشت)، موقع محلي فمراكش حط خبر باللي شخص إسرائيلي حط الطوموبيل ديالو فشي بلاصة ممنوعة، وباللي فاش جا عندو مول الپارك، حط البطاقة ديال الجنسية الإسرائيلية، فبلاصة باينة وسط الطوموبيل، على أساس أن اللي شاف بطاقة الجنسية ما غاديش يهز الطوموبيل.
حقيقة البطاقة
للتأكد من تفاصيل القصة، تواصل موقع “كيفاش” مع مصادر إسرائيلية باش يعرف حقيقة ديك البطاقة، وعرض عليهم الصورة ديالها، وهاد المصادر أكدت باللي ماشي ديال الجنسية وإنما ديال بطاقة عجز، كتعني أن مولاها من ذوي الاحتياجات الخاصة، وكتعطيه حق يحط الطوموبيل ديالو فبلايص خاصة بالمعاقين حيث عندو مشاكل صحية.
المصدر كذلك عطى للموقع صورة ديال نموذج هاد البطاقة اللي مكتوب فيها بالإنجليزية هاد المعطيات المذكورة.
من جهة أخرى، موقع “كيفاش” تواصل مع مصادر مطلعة في مراكش، واللي نفات الرواية اللي روجت لها بعض المواقع جملة وتفصيلا، وقالت إن الكلام اللي كيتقال في الفيديو المنشور على مواقع التواصل الاجتماعي، مجرد كذوب، والسيد ما استقواش على مول الپارك لا بالبطاقة ولا بالجنسية الإسرائيلية ديالو.
