العمل الفني الأخير ديال مغني الراب توفيق حازب، المعروف بـ”البيغ”، خلق جدل كبير بين متابعي الراب فالمغرب، خاصة أن “التراك” كان كلّو كلاشات لروابا آخرين واللي دارو بلاصتهم فالميدان، ودار إشارة أنه هو ملك الراب وجاي يكلاشيهم كاملين.
حليوة.. الجوانات والشراب وبنت الستاتي
البيغ كلاشا الرابور “حليوة” وهضر عليه ف”التراك” أكثر من مرة، وقال عليه باللي مبلي بالجوانات والشراب، وأنه مكثر من الوشامات، ودارو فالصورة الرئيسية وربطو من عنقو مع صبعو صغير ديال يديه.
وكلاشاه عن طريق صاحبتو “إلي”، المعروفة ببنت ستاتي، وقال عليها نعوت خايبين، باللي دارت كولشي إلا تحتارموا!
ديزي دروس.. أكثر واحد كلاشاه
الرابور “ديزي دروس”، اللي هو واحد من الأسماء القوية فالساحة حاليا، تعمد البيغ يجبد ليه الماضي وقاليه باللي أول خلصة خذاها من عندو، وقاليه باللي ألبوم “بيض وكحل” داز فراديو وأنت مزال كتطلب.
هاد الشي جا ردا على خروج إعلامي ديال ديزي دروس قال فيه باللي البيغ مسيرتو كاملة فيها عمل واحد.
وفي الصورة، بان كيلوح عليه طفية ديال سيكار وواطي عليه برجليه.
طوطو.. فمارينا
الرابور “طوطو” سماه بطريقة غير مباشرة عن طريق “التراك” ديالو “مارينا”، وقال ليه باللي فيديو كليب ديالو عامر غبر بالبنات وديما لاصق فحليوة.
مستر كرايزي.. مسلف طوموبيل وما قاريش
أما مستر كرايزي فقال عليه باللي كيتسلف طوموبيل ويتسلف فيلا باش يبان لاباس عليه، وقاليه باللي ما قاريش وما عندوش حتى الباك، وباللي مغني على الحياة زوينة وهو حياتو ما فيها ما يتشاف.
وفي الصورة بان طايح في إشارة منو أنه من الضحايا في هاد “التراك”.
البنج.. لا راب لا راي
مغني الراب “البنج” قال عليه “البيغ” باللي ما عندو لا مع الراب ولا مع الراي، وباللي ديما كيحاول يتقرب من “حليوة”.
كومي.. مقابل غير البورطابلات
البيغ ضحك على الرابور “كومي” وقاليه باللي مقابل غير البورطابلات وكل ساعة حاط ستوري على إنستغرام.
وهو كان من الناس اللي فالصورة ديال “التراك” وبينوا مربوط والفم ديالو مسدود في إشارة إلى أنه دائما كيحتاج شي واحد يغني معاه باش ينجح العمل الفني ديالو.
الرابور مسلم.. الضحايا القدام
الرابور مسلم ما هضرش عليه البيغ فالتراك، ولكن حطو فالصورة الرئيسية على أنه هيكل عظمي، في إشارة إلى أنه من الضحايا القدام ديالو واللي سالا منهم شحال هادي.
