انتقد محمد نبيل بنعبد الله، الأمين العام لحزب التقدم والاشتراكية، طريقة تدبير الحكومة للملفات الحساسة، وعلى رأسها أزمة كورونا وتداعياتها.
وقال بنعبد الله، خلال استضافته في برنامج “بدون لغة خشب”، أول أمس الجمعة (23 أكتوبر)، على إذاعة “ميد راديو”، “رأينا فراغ تواصلي قاتل، شكون فهاد الحكومة خرج كيفسر ولا كيشرح للمواطنين؟، لا أحد”.
وأضاف: “فاش كيكون الفراغ السياسي بهاد الطريقة لا يمكن نبلورو أي مشروع تنموي كيفما كان، واخا نجيب لجنة و30 أو أكثر من الخبراء اللي فيها، واللي متاكد أنه غيخرجو نموذج تنموي في المستوى… لكن ما نطرحه بقوة هو ملي غتسالي هاد اللجنة شكون غيدير ليها التنزيل؟”.
وتابع الأمين العام لحزب الكتاب: “اليوم البعض فقط من الطبقة السياسة اللي عندو مواقف وعندو الشجاعة… وخصوصا فالمعارضة، لكن لم نر ذلك في أحزاب الأغلبية، أقول لكم بوضوح هادي أضعف حكومة دازت فالمغرب”.
وقال المتحدث: “وجهنا للحكومة نداء أنه تعمر الساحة وما يبقاش الفراغ القاتل، وباركا من التراشق العقيم، الحكومة كانت باستمرار كيتلقاو نهار الخميس كيديرو شوية ديال السينما فالمجلس الحكومي، وابتداء من الجمعة السبت الأحد ما كاين غير عطيني نعطيك، حيت هوما كيفكرو ف2021”.
وتساءل بنعبد الله: “واش كاين شي واحد دابا كيقوليك الحكومة دارت الواجب عليها، واش الحكومة اللي كتاخد قرارات نصاصات الليل، وكتسد مدينة بحال الدار البيضاء كتعلن عليها فالثمنية دالليل وتسدها الطناش، الحكومة اللي كتسد جوج مدن أخرى اللي هوما طنجة وتطوان وكتعلن عليها السبعة وتسدهم فالطناش، هاد الشي غير مبرر واخا حالة الطوارئ الصحية شوف إسبانيا وفرنسا ما كانش هاد الشي”.
واعتبر بنعبد الله أن “الحكومة اللي كتتصرف هاكا بالنسبة ليها المواطن ما موجودش، بالنسبة ليها فكرة المواطنة والتعامل مع المغاربة على أنهم عندهم حقوق وعليهم أن يخبروا، هاد الحكومة فين شفتيها مشات للتلفزيونات وفسرات للمغاربة شنو الوضع الاقتصادي اليوم ولا الوضع السياحي فمراكش وأكادير ولا الاوضاع الاجتماعية؟، ما كاين شاي”.
وأردف المتحدث: “حتى عمليا فاش كيبغيو ياخدو شي قرارات ما كيخرجش شي حد يحضرها، هناك بعض الأفراد داخل الحكومة دايرين عمل لابأس بيه ومن بينهم وزير التعليم، ولكن كتخليوه كحكومة بوحدو…”.
