ودابا غير اللي باقي ما زال يدوي على الكرة فالمغرب. السي هفتي، الطبيب ديال المنتخب، كيقول، ويتعلق من لسانو، باللي أغلب الكوايرية فالمغرب كيضربو الشيشا، وعاطيينها للقصاير، وشحال من واحد فيهم ما شابعش نعاس.
إيوا كيفاش بغيتو المغرب يكون عندو منتخب ديال الكرة؟ بهاد اللعابة واخا يجيبو الفيفا يديروها فالجامعة ديالنا، وواخا يجيبو داك كوارديولا، والله لا طفرناه.
وهاد الشي كامل كيجيو شي وحدين يقول ليك اللاعب المحلي. ومصيبة هادي صافي. المشكلة ديال الكرة فالبلاد، خصوصا فالبطولة، أن الاحتراف ما كايكونش غير بالتيران والفلوس، الاحتراف عقلية، ولكن شي لعابة ديالونا غير كيدخلو شوية ديال الصرف، وكيوليو يدوزو فالتلفزة كيسحاب ليهم ولاو نجوم، وعوض ما يمشيو يترينيو كيبقاو يدورو فليبواط، وتابعين النشاط.
هاد الشي علاش قليل فين تلقى شي لاعب يعرف يركب جملة مفيدة.
الحاصول، يلا طفرناه، ها وجهي.
تشاو تشاو.
