محمد المبارك
في أول يوم لاختبار قوة الدرهم المغربي في السوق العالمية، بعد قرار “التعويم”، المغاربة فاقوا هاد الصباح وكلشي حاضي تغيرات صرف الدرهم مقارنة بالعملات الأخرى، ودخلو لبعض المواقع اللي عمرهم زاروها حتى لهاد المناسبة.
واختلفت ردود الفعل بين رواد الفايس بوك، بين مستغرب وساخر.
الناس ديال الفئة بداو يطرحو العديد من التساؤلات، واستغربوا لأن قيمة الدرهم مقابل الدولار أو الأورو ولاّت كتتبدل بين الفنية والأخرى، وعلق أحدهم: “واخا نفس الموقع ولكن كل مرة تتخرج قيمة جديدة، ما بقيت فاهم والو”.
فئة الساخرين من القرار لاحظت انخفاض قيمة الدرهم، وكاين اللي قال باللي “النتائج ديال القرارات غير المدروسة” بدات كتبان. وتداول البعض عبارة “عوم يا عوام، غادي نعومو كاملين”.
ومثلما هو الحال مع قضايا أخرى، ضروري كتبان واحد الفئة تعلن التضامن وكتبدا تدعي “الله يحفظ من الكارثة”، حيث الانخفاض اللي وقع اليوم خلاهم يتوقعوا حدوث كارثة في الاقتصاد، بل إن البعض توقع أننا نسير على خطى مصر.
هذا ما زال غير اليوم الأول، والمغاربة بداو يعبّرو على المخاوف، وبداو فالشرح والتحليل، وماشي بعيد أن المغاربة غادي يرجعو حافظين “صرف العملات”، ومواقع الدوفيز غادي ترجع من أكثر المواقع زيارة من طرف المغاربة.
هاد الشي يلا ما دازتش سبعيّام ديال الباكور ونساو كلشي بحال كيف وقع مع بزاف ديال القضايا.
