أحمد فنان
فالعالم كاين عدد من الفنانين كيعلنو على الفريق اللي كيشجعوه وكيبغيوه، وحتى هنا فالمغرب، عدد من الفنانين بلا لغة خشب كيقول ليك أنه رجاوي ولا ودادي ولا ماصاوي، لكن بزاف منهم ما كيبغيوش يقولو الفريق اللي كيشجعو حيت كيخافو من ردة فعل الجمهور ديالهم، فحال اللي وقع للممثل طارق البخاري اللي بغا يضحك مع الرجاوي محمود بنحليب لكن تقلبات عليه الدعوة وجمهور الرجاء حيّح عليه.
الصنهاجي.. ودادي ما مسوّقش
الفنان الشعبي سعيد صنهاجي ما كاينش شي مرة داز فالتلفزة وما قالش أنه ودادي وكيبغي الوداد حتى الموت.
الصنهاجي شارك فبرنامج “لا علاقة” فقناة تيلي ماروك، وجا لابس التوني ديال الوداد، الشي اللي خلا شي رجاويين يكعاو ويعبرو عليها فالفايس بوك.
الفنان الشعبي دخل ولدو حمزة لمدرسة الوداد باش يولي ڭول، ولكن ما كملش فالمسار الرياضي.
الميلودي.. معارض حسبان
المغني عادل الميلودي رجاوي حقيقي، وما عندوش المشكل يجبد اسم الرجاء فـ”اللايفات” الشهيرة اللي دار.
الميلودي من الناس اللي معارضين سعيد حسبان، الرئيس الحالي للرجاء، وكان قال عليه بأنه بهدل اسم الفريق الأخضر.
حاتم عمور.. ودادي ويفتخر
الفنان حاتم عمور من الفنانين الشباب القلال اللي ما خباش الانتماء ديالو وقال بالفور يا شيفور بأنه ودادي.
حاتم عمور دار فيديو فالأنستغرام ديالو فرحان بتأهل الفريق الأحمر لنهائي دوري أبطال إفريقيا.
الداودي.. صديق اللاعبين
الفنان الشعبي عبد الله الداودي كيشجع فريق الرجاء الرياضي، وكيحضر للتيران بعض المرات ويشجع الفريق.
الداودي دار شحال من أغنية على الرجاء، ومعروف بصداقتو لعدد من اللاعبين ديال الفريق الأخضر، خصوصا عادل الكاروشي.
بهلول.. الديبلوماسي
الممثل هشام بهلول مشجع ودادي حقيقي وكيحضر بزاف للتيران باش يشجع الوداد.
هشام بهلول واخا كيبغي الوداد، ولكن ديما التدوينات ديالو كتكون فيها الديبلوماسية باش ما يجبدش الصداع مع الرجاويين.
