البارح الأربعاء (3 يوليوز)، كان مشكل في أغلب دول العالم في الفايس بوك وفإنستغرام والواتساب، والناس اللي كيستعملو هاد مواقع التواصل بثلاثة لقاو مشكل فيشوفو صور صحابهم، وحتى يصيفطو ليهم صور ولا فيديوهات ولا رسائل صوتية.
المشكل، حسب مواقع متخصصة ما زال مجهول، وحتى إدارة الفايس ما قالتش شنو السبب، وبقات ساعات طويلة من بعد المشكل عاد خرجات باعتذار من الحساب الرسمي ديالها فتويتر، ولكن ما دارتش توضيح منين جا المشكل.
الرواد المغاربة داروها فالأول ضحك وتقشاب وبداو كينشرو صور بيضة، وكيقولو باللي فضيحة شي واحد ولا صورة مثيرة ولا شي حاجة اللي كتحرك الفضول، بطريقة ساخرة خلاتهم ينساو المشكل اللي واقع واللي صعب على ناس كثار المحادثات ديالهم، وخاصة اللي عندهم تواصل بناس خارج المغرب.
من جهة أخرى، واحد المجموعة طلقات رسائل على شكل “أرسلها ولك الأجر” كيقولو فيها باللي مدير شركة واتساب كيقول للناس صيفطو رسالة ل30 واحد عندك باش ترجع عندو علامة زرقاء وإيلا ما صيفطتيهاش غادي يرجع بالفلوس.