على ما كيبان، شي وسائل إعلام جزائرية باغية تشوه الصورة ديال المغرب باش ما كان، سوا بالكذوب ولا بالتدليس، المهم عندهم هو المشاركة فالحملة اللي طلقوها الكابرانات شحال هادي ضد المملكة.
آش واقع؟
ول لبارح الجمعة (8 يوليوز)، قناة “ألجي 24” الجزائرية دارت شي حاجة سمّاتها “وثائقي”، المدة ديالو 20 دقيقة، بعنوان “المغاربة في الجزائر… هروب نحو الحياة”.
هاد البريكول الإعلامي، القناة دوزات فيه فيديوهات وصور ديال وقفات احتجاجية متفرقة اللي أصلا وسائل الإعلام المغربية غطّاتها بدون حرج، ولكن القناة خرّجاتها من السياق ديالها، باش تبيّن باللي المغرب كيعيش أوضاع اجتماعية واقتصادية خايبة، وباللي فيه المجاعة والفقر، وباللي المغاربة كل نهار خارجين يحتجو على هاد الشي.
وفوق من هاد الصور والڤيديوهات، التعليق فيه كلام مسيء على المغرب، وكيصوّر الجزائر بحال شي دولة أوروبية كيهربو ليها المغاربة ويحرگو ليها.
كيفاش؟
موقع “كيفاش” بحث فهاد الموضوع وتواصل مع مغاربة عايشين في الجزائر اللي منهم شي وحدين بانوا في الوثائقي المذكور، واللي أكد واحد منهم أن أصحاب البرنامج تفلاو عليهم وضحكو عليهم، وباللي فاش جاو عندهم قالوا ليهم باللي بغينا نديرو وثائقي كيبيّن العلاقة الأخوية بين الشعب المغربي والجزائري، وكيفاش أن المغاربة عايشين في الجزائر بحال يلا فبلادهم، وهادشي كولو ضد الفتنة وضد كلام شي مؤثرين مغاربة وجزائريين اللي كيبغيو يخلقو الفتنة بين الشعبين.
المتحدث كمل التوضيحات ديالو لموقع “كيفاش”، وأكد باللي أصحاب البرنامج قالوا ليه “هاد الشي ما عندو علاقة بالسياسة ولا الاقتصاد وحنا بغينا غير نبينو للشعبين العلاقة الأخوية”، ولكن، وكيف جا على لسانو، “تصدم فاش شاف البرنامج وكيفاش مقدم البرنامج كيتلاعب بالكلام باش يبين باللي الناس هاربة للجزائر من الفقر في المغرب.. في حين الحقيقة أنهم جاو للجزائر حيث اليد العاملة المغربية مطلوبة تما أكثر والمعيشة رخيصة مقارنة بالمغرب”.
علاش؟
هاد الوثائقي وغيرو من البرامج ما هي غير حلقة من حلقات الحملة الإعلامية اللي دايراها منابر جزائرية على المغرب، كتحاول تصورو كدولة فقيرة وما فيهاش حقوق الإنسان، وما فيهاش خدمة، وهاد الشي ما كتقولوش التقارير الدولية اللي كتأكد باللي المغرب رجع هارب على دول شمال إفريقيا، وحتى في السياحة، بحكم أن المغرب رجع قبلة سياحية في الوقت اللي الجزائر رجعو كيحذرو من السفر ليها.
هاد الشي كان قالوا الرئيس الجزائري عبد المجيد تبون براسو، فواحد التصريح لموقع ألماني العام اللي فات، فاش قال ليهم “أنتم الأوروبيين كتشوفو المغرب بحال شي كارط بوصطال، في حين كتشوفو الجزائر بحال كوريا الشمالية”.
