محمد المبارك
فاش كتشوف الإنجازات ديال المدرب الفرنسي هيرفي رونار والوقفة ديالو فالملعب، أول انطباع كيجيك هو أن ورنار كان لاعب كبير ، أو على الأقل لعب في أندية معروفة، ولكن الحقيقة أن المدرب ديالنا، كلاعب، كانت عندو مسيرة يمكن أن توصف ب”الفاشلة”، حيث كانت خالية من الألقاب وحتى الأندية كانت مغمورة.
اللعب مع زيدان
هيرفي روناد، ثاني أغلى مدرب في إفريقيا حاليا، والثاني في تاريخ المغرب كذلك، تزاد سنة 1968 في فرنسا. كانت البداية ديالو كقلب دفاع مع فريق “كان” الفرنسي اللي دوز معاه تقريبا المشوار الكروي كامل. لعب مع زين الدين زيدان شي سنوات، غير رونار كان دائما احتياطي، وزيدان كان نجم الفريق الأول.
فاش طلع “كان” للدرجة الأولى، مشا رونار لأندية فرنسية في الدرجات السفلى، وكيبقى عندو في المسيرة ديالو كاملة مشاركة وحيدة في الدرجة الأولى سنة 1988/1989.
رويضة سوكور
من بعد ما سالا من الكرة كلاعب، رونار قرر يدخل لعالم التدريب، وباش يوفر لقمة العيش خدم كعامل نظافة، وقال فواحد التصريح: “كنت كنشطب إقامات ولحت طارو ديال الزبل. لمدة 8 سنين، كنت كنفيق مع 3 ديال صباح خمسة أيام فسيمانة”.
ومن بعد ما شد دبلوم فالتدريب، مشا لأحد الأندية المغمورة في فرنسا ودوز معاهم عامين، وخدم مساعد مدرب كلود لوروي في الصين وإنجلترا، وتما بدا كيتعرف رونار ولكن غير عند رؤساء الفرق، كمدرب يسد الفراغات اللي كيخليها مدرب مقال.
قميجة بيضا
سنة 2006 غادي تكون أول سنة يجي فيها رونار لإفريقيا، كان مساعد مدرب مع كلود في المنتخب الغاني، وبعد عامين غادي يشد أول منتخب في المسيرة ديالو اللي هو زامبيا، وصلهم لربع النهاية سنة 2010 في أمم إفريقيا، وغادي يمشي لأنغولا كمدرب.
في أنغولا دوز 6 شهور، فيها بزاف ديال المشاكل الإدارية والقانونية وحتى المادية، حيث ما خلصوهش وحتى الفيزا ديال الخدمة ما شدهاش، ومن بعد غادي يمشي لنادي اتحاد الجزائر، ويدوز معاهم عام ويرجع لمنتخب زامبيا، ومعاهم غادي يحقق أول لقب في التاريخ ديالو كمدرب اللي كان كأس إفريقيا للأمم سنة 2012، ومن تما وهو كيلبس قاميجة بيضا في المباريات حيث كيشوف فيها فال الخير عليه.
التجارب الفاشلة
قصوحية الراس ديال رونار خلاتو يرجع لفرنسا ويمشي يدرب نادي سوشو، واخا شاف التجارب ديالو مع الأندية فاشلة، ولكن رجع يجرب زهرو، وكالعادة تجربتو فشلات الشي اللي خلاه يرجع لإفريقيا عاوتاني من بوابة الكوت ديفوار، وفي أقل من عامين ربح معاهم اللقب الإفريقي سنة 2015.
عاوتاني رجع رونار لفرنسا، ولكن هاد المرة مع فريق كبير اللي هو فريق ليل الفرنسي، دوز فيه تجربة فاشلة وهما يجريو عليه في أقل من 6 شهور.
مونديال روسيا
سنة 2016 رينارد غدي يرجع لإفريقيا، كمدرب للمنتخب الوطني المغربي، في قرار أثار الكثير من الجدل خاصة الراتب ديالو اللي كان الثاني في تاريخ المغرب، وكذلك الإقصاء ديالو من ربع نهائي كأس أمم إفريقيا قدام مصر، اللي كان المنتخب المغربي ديما كيربحها، وتما خرج بتصاريح مثيرة للجدل هاجم فيها المدربين والمنتقدين، ولكن رئيس الجامعة فوزي القجع تدخل وخلى الثقة ديالو فرونار باش يدوز تصفيات كأس العالم.
ومن بعد مباريات التصفيات هيرفي رونار قدر يحقق الهدف اللي جا على قبلو للمغرب، وفي شهر نونبر 2017 قدر يأهل المنتخب المغربي لكأس العالم 2018 في روسيا، واخا الحظ ما وقفش معاه حيث طاح في مجموعة صعبة مع البرتغال وإسبانيا، ولكن رونار كيقول باللي غادي يخلق المفاجأة.
يمكن توقف معاه القميجة البيضا عاوتاني.
