هاد الريح ديال الفايس بوك ما بقى يعرف المتابع لاش من جهة كيدي، البارح فاش نتشرو التصاور “تمثال السمكة” اللي تصاوب في جماعة المهدية إقليم القنيطرة، كانت موجة كبيرة ديال الانتقادات والسخرية، ومطالب بالهدم ديالو، ومن بعد فاش تهدم، خرج مولاه اللي صاوبو كيبكي وتعاطفو معاه عاوتاني بشكل غريب.
واش غير بقى فيهم السيد وخرجو يدافعو؟ ولا بصاح عجبهم داك “التمثال”؟ حيث راه ولاد الضومين براسهم ما عجبهمش هاد الشي، ومن بينهم الفنان التشكيلي محمد منصور الإدريسي، اللي عقل على الصورة وقال “عندما تصبح الرداءة عنوانا للإبداع التشكيلي”. وزاد “أندد بشدة ببشاعة النصب الذي تم تثبيته في إحدى ساحات مدينة المهدية بإقليم القنيطرة، وأنبه المسؤولين من موقعي كفاعل في الحقل التشكيلي إلى خطورة مثل هذه الأعمال التي من شأنها المساس بالثقافة البصرية والتربية الجمالية للناشئة، وأندد بإغفال المسؤولين وتغاضيهم عن إشراك الفنانين التشكيليين المحترفين في مشاريع الجماعات المحلية ولو على سبيل التشاور…”.
وفجهة أخرى فين كيتجمعو بعض العولما ديال الفايس بوك خرجو كيقولو دفاعا عن النحات باللي داك التمثال ما فيه حتى شي عيب، وباللي السيد دار جهدو وغير اللي فراسو العجينة هو اللي غادي يشوف شي شكل جنسي! اوا هاد الفئة الجواب ديالها كتباتو “ديلي ميل” البريطانية اليوم الجمعة (18 شتنبر)، وسماتو التمثال البرونوغرافي، فشنو بقى مازال؟ واش يبغي الواحد يكون خارج مع عائلتو حتى يشوف داك العجب فالزنقة!
هاد الفايس بوك ما عندوش منطق، ويقدر أي واحد يخرج يبكي تتعاطف معاه مجموعة كبيرة، واخا يكون كيكذب وكيدعي الزور، ولا يكون داير زبلة قدها قداش، المهم غير يبكي وراه غادي يلقى ناس عالقرص، كتتنسى غير إمتى تدير بارطاجي وتكتب منشورات مأزرة للسيد وتحمل المسؤولية لجهات وهمية ويتهموما باللي كتقمع المواهب، وكيحطمو الناس وكيفقدوهم الأمل، ولكن نساو باللي هاد التمثال تصاوب فالشارع العام واللي فالأصل كان على السيد يصاوب التمثال ويعرضو على الجماعة وفاش يوافقو يجي يحطو، ماشي يقولو ليه “هاد الفلوس سير تخدم” حيث راه كان يقدر شي عجب كثر من هاكا، وديك الساعة، خاصة أنه بلسانو كيقول “ماشي محترف وغير هاوي وتعلم فالعجين”.
