صحاب الأمر بالمعروف والنهي عن المنكر كيعرفو يحكرو غير على العيالات، وأي حاجة فيها امرأة ما قادراش تدافع على راسها كيجيو يخرجو التفرعين ديالهم. كيفاش؟
واحد من رواد مواقع التواصل الاجتماعي نشر فيديو على الحساب الشخصي ديالو كيوثق فيه قدوم نساء عند شوافة كاينة في الدرب ديالهم، حسب إدعائه.
الفيديو، اللي ما باينش من أي مدينة، كيبان فيه مجموعة من النساء كيجيو قدام باب واحد الدار، وكيتهجم عليهم مصور الفيديو وكيبقى يصور فيهم بالقوة، وحتى اللي خبات وجهها كيجر ليها يديها باش يشوهها مع راجلها كيف كيقول.
وبعد انتشار الفيديو، اعتبرت مجموعة من رواد مواقع التواصل الاجتماعي أن “هاد الشي تشهير وتشويه للسمعة، وقالوا باللي هاد الشي كان عليه يمشي عند البوليس ويبلغ بالشوافة يلا عندو دلائل، أما تشويه الناس بهاد الطريقة ماشي صحيح”.
وقال آخر في تعليقه: “غادي تبقى تصور زوجات الرجال بحال هاكا حتى يجو البوليس يشدوك بالتشهير وتصوير الناس بدون إذن، يلا عندك دلائل، سير ديها للبوليس ودعي الشوافة”.
ومقابل ذلك، دافعت مجموعة أخرى من رواد مواقع التواصل الاجتماعي عن هذا السلوك، رغم أن القانون يجرمه ويعاقب عليه.
