من قبل ما كانت الشهرة حكر على الفنانين والرياضيين، مواقع التواصل الاجتماعي أحيانا كتخلق للبعض شهرة كبيرة بدون ما تكون شي موهبة خاصة أو شيء استثنائي، ويقدر غير بصور أو جسم جميل يولي شخص مثير للجدل. كيفاش؟
الخميسات
ندى حاسي بنت مدينة الخميسات عندها 21 سنة، دخلات لمواقع التواصل الاجتماعي سنة 2016، وغادي تعرف شهرة كبيرة من خلال الصور ديالها في أقل من سنة.
البداية
القصة ديال الشهرة ديال هاد البنت غريبة شوية، حيث بدات غير بالضحك، وكانت كتنشر صور في المجموعات الخاصة بالبنات، وبداو بعض الناشطات كيتهموها باللي كتلبس سراول ديال بونج باش تبان عندها الفورمة، ومن تما غادي يبدا الجدل على هاد البنت، ويبقاو الصور ديالها كيروجو في مواقع التواصل الاجتماعي، وعدد المتابعين عندها كيتزاد.
البوز
من بعد، وقع بينها وبين واحد الصديقة ديالها سوء تفاهم وهي تلوح شي صور ديالها بملابس السباحة. ولأن كيد النساء ما ساهلش، صاحبتها حطات دوك الصور على أساس أنها هي باستعمال “فوكونط”، وهنا غادي يبدا البوز، حيث عدد متابعي ندى حاسي طلعو من 10 ألف متابع إلى 50 ألف متابع في ظرف قياسي.
إنستغرام
ندى خرجوها من بزاف ديال الكروبات النسائية، لأسباب مجهولة. هي كتقول “حسدوها” والمشرفات على الكروبات كيقولو أنها خسرات ليهم السمعة ديال لكروب.
وفداك الوقت قررت تدير حساب على إنستغرام وتدخل الكروبات عربية فين ما لقاتش المشكل، وحتى المتابعين ديالها بقاو كيتزادو ورجعو من مختلف الدول العربية ووصلوا في الفايسبوك 130 ألف متابع و500 ألف متابع في إنستغرام، بالضبط في نهاية سنة 2017.
الغناء
ندى قررت تدخل لعالم الغناء والفن والإشهار على إنستغرام من بعد ما مشا ليها الحساب الفايسبوكي بكثرة التبليغات، وبدات بأغنية صوت فقط “دار فيا حالة”، واللي وصلات 180 ألف مشاهدة من تاريخ الطرح ديالها في 12 دجنبر الماضي.
مقال جزائري
سنة 2018 رجعات صور ندى حاسي من أكثر الصور تداولا على الصفحات في مواقع التواصل الاجتماعي في المغرب والجزائر وتونس، وغادي يكتب عليها موقع جزائري متخصص في المشاهير ديال مواقع التواصل الاجتماعي ويقول عليها “الشابة المغربية التي كتبت اسمها بحروف من ذهب في سماء الفن المغربي”. عنوان ومقال خلقوا جدل كبير بين العديد من رواد الفايس بوك واللي قالوا “كيفاش دارت ليها.
تكريم
مؤخرا ندى دارت أغنية بالفيديو كليب واللي لقات عليه انتقاد كبير، وقالوا بعض الفايسبوكين أنها كتحاول تقلد “سومادينا” حيث ركزت على الجسد ديالها، ولكن اللي خلق جدل أكبر هو مشاركتها في حفلة في مدينة فاس وتكريمها كفنانة صاعدة.
أكثر من 868 ألف متابع
حاليا ندى حاسي واحدة من أكثر الحسابات متابعة في المغرب، حيث عندها أزيد من 868 ألف متابع على إنستغرام.
