فالوقت اللي المنتخب الوطني غادي مزيان فإقصائيات كأس إفريقيا، خرجو من جديد شي فهايمية كينتقدو اختيارات الناخب الوطني وحيد حاليلوزيتش، واخا المنتخب دابا متصدر المجموعة ديالو ب10 نقاط، وخاصو غير نقطة واحدة ويتأهل وباقي ليه جوج ماتشات.
اختيارات وحيد
ممكن الناخب الوطني زاد “فلسفة” شوية في التشكيلة الأخيرة ضد منتخب إفريقيا الوسطى، خاصة فاش لعب رومان سايس فالظهير الأيسر وأشرف حكيمي كجناح، وأيمن برقوق كلاعب وسط متأخر، وهاد الشي اللي خلى هاد المنتقدين يهضرو من جديد، ولكن راه النتيجة هي اللي مطلوبة من المدرب حاليا، حيث هادو إقصائيات، والمهم هو ضمان التأهل مبكرا، ماشي الأداء والفرجة اللي كانت كتخلي أسود الأطلس يدخلو سنوات هادي فالحسابات المعقدة.
وحيد ما جابش الجديد!
الواضح أن بعض هاد المنتقدين ما متابعينش المحترفين بشكل دقيق، حيث أشرف حكيمي حاليا مع إنتر ميلانو الإيطالي، راه كيلعب فخط الوسط وكيكون متقدم، وهاد الشي اللي كان شرحو وحيد فالمؤتمر الصحافي شهر أكتوبرر اللي فات، وحتى رومان سايس لعب ظهير أيسر مع وولفرهامبتون الإنجليزي وحتى فوسط الميدان، وأيمن برقوق حتى هو لعب فخط الوسط وهاد المركز كيتعبر المركز ديالو الثاني، حسب الورقة التعريفية ديال اللاعب.
شح المحاولات
يوسف شيپو، اللاعب الدولي السابق والمحلل ديال قنوات “بي إن سبوترز”، واللي مدوز الكرة، لبارح الثلاثاء (17 نونبر)، بعد الماتش، ما هضرش على هاد الموضوع بهاد الشكل، وإنما دخل فصلب الموضوع، وقال باللي الماتش فيه بزاف ديال النقاط الإيجابية، وبعض الأخطاء الفردية.
وزاد باللي وحيد حاليلوزيتش كان الهدف ديالو هو حسم التأهل ومن بعد يعطي اللاعبين فرصة يلعبو باش يوقف على التشكيلة.
وحتى على مستوى الأسماء، شيپو هضر فصلب الموضوع، وقال باللي المنتخب الوطني خاصو ظهير أيسر صريح، وهاد المشكل بطبيعة الحال هو اللي كتعاني منو تشكيلة الأسود سنوات هادي.
