مع اقتراب عيد الأضحى، أغلب المغاربة كيكون عندهم تخوف كبير من شراء الأضحية، بسبب الأمراض اللي كتكون في الخرفان، واللي صعيب يرد ليها البال أي زبون.
موقع “كيفاش” اتصل بتقني متخصص في تسيير الضيعات، وقدم نصائح عامة حول شراء كبش العيد.
الوقفة والحركية
يقول عبد الله باللي الكبش خصو يكون واقف، ويكون كيتحرك وماشي جالس وما كيدير حتى ردة فعل، لأن حالة السكون عند الكبش كتعني المرض.
المقاومة
ويضيف التقني أن طبيعة الكبش هي عدم الاستسلام لأي واحد، بمعنى آخر أن الوقت اللي كتبغي تجرو عندك، أي تاخذو معاك، فهو كيدير مقاومة وما كيبغيش يمشي، أما في حالة كان استسلام فيعني أن الحالة الصحية ديالو ماشي مزيانة.
سيلان أنفي والفضلات
كما يؤكد عبد الله باللي الماء اللي كيخرج من الأنف ديال الكبش، والحالة ديال الفضلات حتى هي مؤشرات على الحالة الصحية، بحيث أن الكبش اللي بصحة جيدة ما كيكونش عندو ماء في الأنف، والفضلات ديالو كتكون صلبة.
الصوف والجلد
كما يؤكد المختص أن حالة الصوف والحبوب اللي كتكون في الجلد علامات مهمة في اختيار الأضحية، بحيث أن الصوف خاصو يكون مشدود مع الجلد، وما كيزولش بسهولة، كما أن وجود حبوب تحت العنق أو الإبطين دليل على المرض.
حالة الخصيتين
من بين النصائح اللي قدمها عبد الله هي مراقبة حالة الخصيتين، ويؤكد في حديثه أن الخصيتين خاصهم ما يكونوش سخان أو واحدة أكبر من الأخرى، كما يجب الانتباه ليكونو حبوب تحت الجلد في المنطقة اللي قريبة ليهم.
احمرار تحت العينين
الكبش اللي كان كيعاني من الألم، الجلدة اللي كتكون تحت مغطية العين فاش كنقلبوها كتكون حمراء أو فيها العروق، حيث الحالة الطبيعية هي تكون بيضاء.
انتفاخ البطن والمشاكل الهضمية
كرش الكبش ما خاصهاش تكون منفوخة بحال بالون، وفي حالة كان الانتفاخ فالواضح أن الكبش كيعاني من مشاكل هضمية.
وفي الختام يؤكد عبد الله أن الأسواق خاص يكونو فيها بيطريين وتقنيين مختصين باش يراقبوا الأضحيات، لأن هاد العشوائية اللي كاينة في الأسواق يمكن تسبب عواقب وخيمة.
