كاين شي وحدين فاهمين التضامن مع القدس فشي شكل، ودايرين “الجهاد الإلكتروني” على مواقع التواصل الاجتماعي. كيفاش؟
مع إعلان دونالد ترامب القدس عاصمة لإسرائيل بداو شي وحدين فالفايس بوك كيبدلو تصاورهم ديال البروفايل زعما كأسلوب احتجاجي على قرار الإدارة الأمريكية.
وكاينة مجموعة أخرى من النشطاء قلبوها شعر غسان كنفاني وتدوينات تضامنية مع القدس، وأغاني على فلسطين.
وكاينين وحدين آخرين مشاو بعيد، وبداو كيروجو على مواقع التواصل الاجتماعي دعوات لمقاطعة مواقع التواصل الاجتماعي، قال ليك باش “توقع خسارة لهاد الكفار والمجرمين اللي راه جاين على المسجد الأقصى”.
هاد “الجهاد الإلكتروني” أثار سخرية بعض النشطاء اللي بداو يروجو تدوينات من قبيل “العرب إذا غضبوا غيروا صور البروفيل”، و”مارك عيط لترامب قاليه عتق المغاربة بدلو تصاور البروفايل”.