محمد المبارك
كل مرة كيخرج لينا نصاب جديد على مواقع التواصل الاجتماعي، وهاد المرة عندنا نصابة والفتوح ديالها روشارج وبخورها التصاور. كيفاش؟
حساب فايسبوكي، باسم “حليمة شوافة”، كان كينشر صور للماكياج والأغراض النسائية المعروضة للبيع، ومن بعد ما بان أن التفاعل قليل والبيع والشراء ناقص، قلبها “تاشوافت”.
صاحبة (أو صاحب) الحساب نشرت تدوينة في واحدة من الكروبات النسائية تدعي فيه أنها شوافة وقادرة تلاقي القلوب وبدون شعوذة أو الطرق الأخرى المتداولة.
وحسب مجموعة من الفتيات اللي تواصلوا معها في الخاص، فهي في أول الحديث كتطلب الفتوح، اللي هو عبارة عن تعبئة، وعلى الأقل خاصها تكون 5 دراهم، ومن بعد ما كيرسلو التعبئة كتقوليهم باللي الغرض راه تقضا وراه مول النية كيربح ومن كينقطع التواصل معها.
وحسب أخريات، فإن “الشوافة حليمة” كتطلب صور مثيرة لجسد الزبونة، باش يتقضى الأمر بسهولة.
