سفيان البحري، المشرف على صفحة “محمد السادس” على موقع فايس بوك، دخل طول وعرض فمهدي بنكيران، اللي كيقول باللي عندو شي جمعية سميتها “محبي الملك محمد السادس”. كيفاش؟
سفيان البحري قال، فواحد التدوينة، باللي ما كاينة حتى شي جمعية عندها هاد السمية ديال “محبي الملك محمد السادس”. وقال أيضا: “إن صادفتم وجود اسم لجمعية بهذا الاسم أو غيره فاعلموا أنها مجرد كذبة أو تحايل من أصحابها”.
هاد الجمعية هي اللي كيقول مهدي بنكيران راه دايرها. بنكيران اللي حتى مرة مرة كينشر تصيورات ديال الملك والأسرة الملكية، واللي فالغالب كيخدها غير من الأنترنت، وكيدير فيها سميتو، زعما راها حصرية.
ومن غير التصاور ديال الملك، مهدي بن كيران كان كيقدم راسو في الأنستغرام على أنه “خبير في الأسر الملكية”، قبل ما يكثر عليها اللغا ويحيدها. وفي تطبيق “true caller” داير اسم “المهدي البروتوكول الملكي”.
ولحد الآن ما معروفش واش هاد الجمعية ديال “محبي الملك محمد السادس” كاينة بصح وبوراقها، ولا غير حتى هي زادها بنكيران لهاد الألقاب كاملين.
