محمد المبارك
مهرجان “تيميتار” في أكادير بدا شاخض مع أيمن السرحاني. كيفاش؟
في بداية سهرة أمس الأربعاء (4 يوليوز)، أيمن السرحاني فاش جا دخّل معاه 2 فيدورات ما خلاو حتى واحد يقرب ليه، لا الصحافيين اللي واقفين ولا بعض المعجبات اللي كان العدد ديالهم قليل في الكواليس. والغريب أنه رغم هاد الحماية كاملة، أيمن بقا داير كاسكيط ومخبي وجهو.
ومن بعد الصعود ديال أيمن للاسين، دوز ما يزيد عن ربع ساعة وهو يكرر في نفس الجمل وكيدير حركات “كراطي” كيتفاعل بها مع الموسيقى، ثم بدا كيغني بعض الأغاني اللي تشهر بيهم، بحال “تجيني بالسورفيت” و”حياة”، واللي غناها الجمهور معاه، ولكن كان اختلاف كبير بين التسجيل على موقع يوتيوب والمباشر (اللايف والبلاي باك)، خاصة أن الفريق اللي خدم مع أيمن في تيميتار أغلبهم عاد بدا الخدمة معاه، فكانت شوية ديال الصعوبة في التنسيق.
قبل ما يسالي الحفل، أيمن نزل قدام المنصة باش يكون قريب من الجمهور، وخدا سيلفيات مع الجمهور وهو كيغني، الشي اللي عجب عدد كبير من المعجبات ديالو، خاصة اللي كانوا قراب.
فنهاية الحفل أيمن عطى ربع ساعة لبعض المعجبين يدخلو عندو للكواليس يتصورو معاه، وقاليهم لبنات هما الأولين، ولكثرة الأشخاص وضيق الوقت البنات هما اللي تصورو معاه في الأخير.