شرع مشجعون مغاربة في تجهيز وحزم حقائبهم استعدادا للسفر إلى الكوت ديفوار لمساندة المنتخب الوطني المغربي في كأس أمم إفريقيا المنتظر إقامتها في ساحل العاج خلال الفترة الممتدة بين 13 يناير الجاري و11 فبراير المقبل.
ووجه الدكتور طيب حمضي، الباحث في السياسات والنظم الصحية، نصائح طبية قيمة يجب على المشجعين المغاربة الذي سيتنقلون إلى ساحل العاج اتباعها من أجل الحماية من الأمراض والفيروسات.
شنو اللقاحات اللي خاصكم ديرو؟
وفي تصريح لموقع “كيفاش”، أكد الطيب حمضي أن “النصائح الطبية في السفر بشكل عام كتكون على حسب صحة كل شخص والسن ديالو وعلى حسب المدة اللي غيبقى فيها فالدولة اللي غيسافر ليها، وعلى حسب الوضعية الصحية العامة في الدولة اللي غادي ليها”.
وأضاف بخصوص اللقاحات أنه “بالنسبة للمغاربة اللي غادي يمشيو لساحل العاج يشجعو المنتخب الوطني، وغيدوزو مدة طويلة مثلا شهر، خاص يديرو تلقيح الحمى الصفراء هذا ضروري باش دخل للكوت ديفوار، وينصح عاليا المسافرين يكون عندهم التلقيح ضد الملاريا وهذا كيديروه فالمغرب قبل السفر وخلال السفر وبعد السفر”.
شنو الدوا اللي تاخذو معكم؟
بالنسبة للنصائح الأخرى، أوضح حمضي أن ” الإنسان اللي مريض وكياخذ أدوية معينة ياخذها مدوبلة، وديو معكم حتى الأدوية العادية بحال الباراسيتامول والفيتامينات وغيرهم اللي كيستعمل فالدار ديالو، باش يلا كانت شي أعراض بسيطة ما يحتاجش يمشي للمستشفى ولا للطبيب ويتلاقى مع ناس مراض بأمراض أخرى ويتعادى”.
شنو خاصكم تلبسو؟
وشدد الدكتور حمضي على أنه “كاين عدد من الأمراض الفيروسية اللي كتنتقل عن طريق الحشرات الطائرة اللي كينقلو عدد من الأمراض من بينها الملاريا وغيرها، إذن خاص الناس يلبسو حوايج اللي يغطيو ليهم يديهم ورجليهم، ويكونو واسعين وخفاف واللون ديالهم يكون فاتح باش ما يجرش عندهم هاد الحشرات، يستعملو بعض المواد في الجسم ديالهم اللي كيجريو على الحشرات، ويحميو الغرفة ديالهم فالفندق وما يحلوش الشراجم ويستعملو الكليماتيزور باش ما يدخلوش الحشرات، ويديرو شي حاجة اللي تحمي ليهم الفراش ديالهم من الحشرات اللي كتنقل هاد الأمراض”.
شنو خاصكم تاكلو؟
أما بالنسبة للتغذية، أبرز الطبيب الباحث في السياسات والنظم الصحية، أنه “من الأحسن الناس يبعدو كل ما أمكن من الغذاء اللي ما دايزش على العافية يعني ما طايبش، بحال شلاظة، حيت اللي طايب كيقتل بززاف ديال الميكروبات”.
وأضاف “ديما الماكلة تكون طايبة مزيان ما تكونش ناقصة فالطياب، مثلا الحليب يكون معقم أو مغلى”، مشيرا إلى أن “الماء يستحسن يكون ماء فالقرعة ماشي ضروري يكون معدني المهم يكون فقرعة مسدود مزيان”.
وبخصوص الفواكه، أكد حمضي أن “الفواكه خاص تغسل مزيان في ماء نقي وتقشر عاد كولوها، عادة كنقولو الفواكه ما تقشرش ولكن فالسفر من الأحسن تقشر باش تجنب الإسهال والقيء وما إلى ذلك، ومن الأحسن تجنب عصير الفواكه”.
إجراءات احترازية
كما شدد حمضي على “الغسل بالماء والصابون دائما ويكون معاكم المعقم، وخلال المقابلة خاص الإنسان يدير الاحتياطات ديالو الضرورية فأماكن الازدحام ويكون عارف منين كيخرج هاد الشي كلو خاص يدير البال معها باش يحافظ على الصحة ديالو”.
وأشار الدكتور حمضي إلى أنه “حنا دابا فالفصل بارد وكاين أمراض الزكام كتنتشر وأمراض أخرى فيروسية، يعني الانسان يحاول يتجنب الأماكن المغلقة، والأماكن اللي فيها الزحام بزاف والتجمعات وما شي فالهواء الطلق”.
وتابع “تجنبو الناس اللي عندهم أعراض ما تقربوش منهم وسلمو غير من بعيد، والناس اللي عندهم أعراض يحاولو يعزلو راسهم ولا كانو غادي يخرجو من الغرفة ديالهم يديرو الكمامة”.
