بقلم: نجيكم نيشان
داك الشي اللي كان خاص يتقال على هاد الحريرة اللي كتعرفها مشاورات تشكيل الحكومة، قالو ملك البلاد في خطاب المسيرة، لبارح الأحد (6 نونبر)، ووصف ما يجري بـ”توزيع الغنيمة”.
بالدارجة ديالنا كنسميوها الوزيعة. ومن بعد انتخابات 7 أكتوبر هاد السياسيين كاملين دون استثناء نساو الشعب اللي صوت عليهم، وحتى اللي ما صوتش عليهم، وجلسو يوزعو في الكراسة ويضاربو على شكون رئيس البرلمان.
دارو الوزيعة، بلا حشمة بلا حيا، من بعد ما دارو القيامة.
أنا آ سيادنا ما غاديش نحلل الخطاب الملكي، حيت الخطاب واضح وباين وضوح الشمس في نهار جميل، أنا جيت ليوم غير باش نطلب الله يهدي هاد الأحزاب ويشكلو الحكومة قبل ما هاد الوزيعة تخرج لينا على البلاد وتدخلنا في مسار ما بغيناش نمشيو فيه.
ما بغيناش الوزيعة، بغينا المعقول، حيت إفريقيا كاملة حاضيانا، وشي ناس بالضبط حاضيينا هاد ليام.
ما بغيناش الوزيعة، ويلا ما فهمتوش هاد المرة راه عمركم ما تفهمو.
