بقلم: نجيكم نيشان
سمحو ليا على هاد الغيبة، ولكن راه ما كيليقش لي البلوكاج السياسي، كيعجبني غير الديبلوكاج، وشد ليا نقطع ليك والبوليميك، داك الشي علاش خديت كونجي هاد ليام حتى فك الله سراح المشاورات الحكومية.
النهار الأول بعد الكونجي لقيت شباط محيح، تيرا في موريتانيا وتيرا في وزارة الخارجية وتيرا في أخنوش وتيرا في العماري، بقات ليه قرطاسة وحدة الله يحفظ فين غادي يتيريها.
لقيت تاني أخنوش ولّى من الحرايفية ديال السياسية، ولاعب طويل مع ابن كيران، وكيتفاوض من موقع قوة واخا عندو 37 صوت، غير هو مازال ما حاملش شباط يدخل معاه للحكومة.
اللي مهني راسو هو نبيل بنعبد الله، ضْمن التحالف مع ابن كيران ومشا ضربها بسكتة كيتصنط لعظامو بينما سالات هاد الحرب، السيد خايف تجي فيه شي دقة.
إدريس لشكر حتى هو دخل سوق راسو، حاول في الأول يبين أنه لعاب خطير، ولكن التقل السياسي ديالو ما سمحش ليه يراوغ.
