في مدينة أسفي شاب ثلاثيني، الاسم ديالو سفيان الريني، من بعد محاولات كثيرة باش يخدم في الشركات، ما لقاش فرصة، واختار يخدم راسو في عمل كان من قبل حكر على النساء فقط. كيفاش؟
سفيان العمل ديالو هو تنظيف المنازل، وبحكم الإتقان ديالو للعمل والثقة اللي كسب بفضل الأمانة ديالو، مجموعة ديال الزبائن كيفضلو يتعاملو معاه بالرغم من أن تنظيف البيوت عادة عمل كيديروه النساء.
تجربة 8 سنوات
وفي لقاء مع القناة الثانية، هضر الريني على الخدمة ديالو، وقال باللي دار هاد الخدمة 8 سنوات دابا، وعندو زبناء اللي كيتعامل معهم بصفة دائمة طيلة هذه السنوات.
ومن جهة أخرى، الريني كيخدم جارديني، كيقطع الربيع وكينظف الجرادي في مدينة آسفي للزبناء ديالو.
الفايس بوك
ومن الوقائع الجميلة اللي وقعات لسفيان أن أحد الشباب شافو في آسفي وسولو واش عندو صفحة فايسبوكية، ومنين قالوا لا، هاد الناشط الفايسبوكي نشر صورة سفيان وطبيعة العمل ديالو، ورجع سفيان حديث الفايس بوك لأسابيع في شهر يوليوز الماضي.
إعالة الأسرة
ومن التصريحات المهمة اللي قال سفيان أنه بفضل هاد العمل كيوفر مصاريف الكراء ومصروف ولدو، وكذلك كيعين بيه الوالدين ديالو.
وهادي رسالة زوينة لصحاب التشرميل والكريساج اللي أغلبهم كيقولو أن البطالة اللي خرجاتهم لعالم الإجرام.