محمد المبارك
العرس واحد من أكثر التقاليد اللي المغاربة كيعطوها اهتمام كبير، ليلة كتكون خاصة ويقدرو الناس يتخلاو على بزاف ديال الحوايج اللي كتكون في نطاق “الحشومة” و”العيب”، بحال الشطيح والماكياج، وحتى خلع الحجاب، بحكم أن هاد المناسبة كيحضرو ليها فالغالب ناس من العائلة أو ناس مقربين.
ولكن مع الهواتف الذكية وكاميرات التصوير المحمولة الناس كتاخذ فيديوهات للذكرى حتى كتلقى راسها عرضة للشوهة والتشهير. كيفاش؟
العرس كيبقى ليلة وحدة، الناس كتنشط فيها، ولكن بسبب أفعال صبيانية كتّخلق مشاكل كثيرة، وما كاينة حتى طريقة باش يتمنع هاد الشي لأنه خاص الناس تفهم باللي ماشي كلشي باغي هاد النوع ديال الشهرة، وكاين اللي كيسميها “فضيحة”، وكاين اللي كيستعمل الحميمية ديال الناس باش يجمع الجيمات ويطلّع عدد المشاهدات.
سلاح أبيض بسبب فيديو
في 2005، في مدينة الدار البيضاء، واحد الشاب صور بنت كتشطح فعرس ومن بعد نشر هاد الفيديو فسيديّات.
الفيديو انتشر، ولما وصل لعائلتها ما تقبلوش الأمر، وناض الأخ ديالها جمع صحابو ومشاو لمصور فيديو. القضية كملات بالمواس والشواقر وما فكّها غير البوليس.
فيديو كاد يؤدي إلى الطلاق
سنة 2016، كانت سيدة حامل تعرضات لعرس ديال صاحبتها، ورجلها وافق لأنها قالت ليه باللي القاعة خاصة بالنساء.
بعد أيام قليلة غادي يتفاجأ الرجل بفيديو ديال مراتو كتشطح بطريقة مثيرة منتشر على اليوتوب والواتساب، والأكثر من ذلك أنه كتبان فيه أجزاء من الجسد ديالها. هاد الشي كان غادي يوصلهم للطلاق لولا تدخل العائلتين لحل المشكل.
زواج الطمع..
في شهر يوليوز 2017، واحد من أبناء مراكش تزوج بطبيبة من مدينة الدار البيضاء، وشي واحد صور فيديو العرس ونشرو على الفايس بوك، بعنوان “مغربي تزوج بإفريقية غنية بسبب طمعه في ثروتها”.
“شوهة” أكبر كوبل..
فيديو مدته أقل من دقيقتين صورو واحد من الحضور، ليشعل الفايس بوك المغربي كامل، وكلشي ولّى كيهضر على أكبر كوبل. مولات العرس ما عجبهاش الحال، وقالت باللي اللي خرّج الفيديو دار ليها الشوهة، وهي ما كانت باغية حد يعرف هاد الشي.
قبلة العمارية..
في سنة 2017، انتشر فيديو على يوتوب مدته 48 ثانية فقط لعروسين فوق العمارية يقبلان بعضهما في الفم.
الفيديو خلف تعليقات سلبية كثيرة، حيث وصف البعض العروسين بقلة الحياء وقلة العرض، ورغم أن الناس مزوجين فئة كبيرة من المغاربة ما تقبلوش الأمر.
