مع اقتراب عيد الاضحى كيبدا السباق نحو الأسواق باش كل واحد يشري أحسن حولي، واللي يكون مناسب للقدرة الشرائية ديالو، وتكون فيه الشروط اللازمة باش يكون “أضحية العيد”، وكاينين طرق مختلفة للبيع على حساب كل كساب والشطارة ديالو.
البيع التقليدي.. الكوري والرحبة
من طرق البيع المعروفة من زمان هي البيع من داخل “الكوري” أو الكساب كيمشي للرحبة باش يبيع.
زكرياء، كساب من نواحي منطقة حاحا في إقليم الصويرة، قال، في تصريح لموقع “كيفاش”: “أنا أزيد من 20 سنة وأنا كندير هاد الحرفة، ومنين بديت وأنا كنتعامل مع زبناء خاصين منهم المعارف والأقارب، وفاش كيبقى للعيد يوماين كننزل للرحبة، لأن المشكل ديال الرحبة هو الناس ما كتعطيش الثمن، وما كتبيعش سلعتك بالعز”.
البيع في الأسواق الممتازة
أما بالنسبة إلى عبد الكريم، وحتى هو كساب، فكيقول باللي كيفضل يتعامل مع الأسواق الممتازة، لأنها كتسهل عليه الأمورية.
ويقول: “أنا كتكون عندي 3500 راس باش نديها للرحبة خاصني رحبة ديالي بوحدي، وحتى الناس فاش غادي تشوفك كتشد الفلوس تقدر تبغي تسرقك ولا تتعدا عليك، زائد شكون غادي يقدر يقابل ليك هاد العدد كامل، هكاك علاش أنا من 13 سنة هادي وليت كندفع الكسيبة ديالي كاملة لسوق ممتاز هو كيتكلف بكولشي ومن بعد العيد كيعطوني فلوسي”.
صفحة على الفايس بوك
وتماشيا مع التكنولوجيا والعصر الرقمي، محمد ولد منطقة ولاد صالح، اختار أنه يحل صفحة على موقع الفايس بوك يروج فيها السلعة ديالو.
وقال محمد لموقع “كيفاش” : “فكرة الصفحة ديال الفايس درتها هادا العام لأول مرة، وبالصراحة الناس كيتصلو وكيسولو، أنا فكرت أنه الناس يلا شافت الصور فكاين احتمال كبير تجي عندك للكوري، واخا الناس كتسول أسئلة كثيرة، وأغلبهم كيقولو هاد الشي نصب، حيث كتجيهم غريبة كساب عندو فايس بوك”.
صحة الكبش أهم من نقطة البيع
وفي إطار البحث عن المكان الأفضل والأنسب لاقتناء أضحية العيد، استفسر موقع “كيفاش” طبيبا بيطريا مختصا في تلقيح وتربية المواشي.
الطبيب البيطري قال: “ما كنشوفش واش كاين شي فرق فالمكان اللي ممكن تشري منو الأضحية ديالك، ولكن اللي نقدر نقول أنه الأحسن الواحد يشري الكبش في الأيام الأخيرة قبل العيد، ويراقب الحالة الصحية ديال الأضحية قبل ما يشريها، الوقفة ديال الكبش والفضلات ديالو والحركة ديالو والصوف، كلها علامات كتقدر تعرف بيها الحالة الصحية ديال الخروف قبل ما تشريه”.
