طارق باشلام
عيد الأضحى المبارك على بُعد أيام فقط، وأسعار التذاكر في المحطات الطرقية هي اللي دارت “گرون” قبل الحولي.
الطبيعي هو الإقبال الكثيف على المحطات، لكن اللي ماشي طبيعي هو استغلال شريحة من المهنيين لظروف مواطنين الذنب ديالهوم، هو أنهم بغاو يدوزو العيد وسط عائلاتهم في مدن أخرى، لإكراهاتْ كلشي كيعرفها، مرتبطة بالسكن ولا ظروف العمل.
مع اقتراب حلول عيد الأضحى المبارك، تعرف المحطات الطرقية خصوصا في مدينة الدار البيضاء وعدد من المدن الكبرى، طلب كبير على السفريات، هاد الإشكال كيتعاود كل سنة.
وفي اتصال هاتفي قال وديع مديح رئيس الجامعة الوطنية لحماية المستهلك، في تصريح لموقع “كيفاش”: “هاد السنة، عيد الأضحى يصادف الزيادات المهولة في ثمن المحروقات، ولصلتنا بالمواطنين من خلال الشكايات، كاينة زيادات في شبابيك التذاكر على المستهلكين، ماشي غير فالكيران حتى في بعض الطاكسيات اللي كاتخدم بين المدن”.
واستغرب رئيس الجامعة الوطنية لدور الدعم اللي كياخدوه المهنيين، يلا ماعاونش المسافرين على استقرار ثمن التذاكر، “هاد السنة كاين دعم للمهنيين في إطار النقل، وبالتالي مايمكنش يتزاد على المستهلكين الثمن ديال التنقل بين المدن، في الوقت اللي الدولة عطات للقطاع امتيازات، وساعداتهوم في امتصاص غلاء المحروقات”.
وتابع وديع مديح بالتأكيد على أهمية المراقبة بالقول: “من الواجب على الإدارات المعنية بهاد القطاع أنها تراقب وبصرامة أكثر من السنوات الفارطة، لزجر المتلاعبين ومنعهم من أي مخالفة عندها علاقة بأثمنة التنقل”. مضيفا في السياق ذاته، أنه بـ “الدعم اللي خداوه المهنيين في هذا القطاع، هم ملزمون بأنهم يحتارمو ثمن التذكرة المتفق عليه، أو اللي هي مُلزِمة ليهم قانونيا”.
