المهدي بنعطية واخا اعتزل دوليا مازال المؤسسة ديالو “بنعطية فونداشيون” كدير الأعمال الخيرية ديالها فالمغرب، واللي كيستفدو منها طبقات فقيرة كتعيش فالقرى والبوادي.
واليوم السبت (22 فبراير)، هاد المؤسسة ديال بنعطية دارو شراكة مع جمعية فزناتة، ودارو قافلة طبية وعطاو لمجموعة ديال الوليدات والعيالات نظاظر طبية.
هاد الشي اللي دارو واحد من أفضل اللاعبين فتاريخ المغرب، فرح دوك الناس بزاف، واللي شكرو بنعطية على الأعمال اللي كيدير.
بنعطية عندو مسيرة احترافية كبيرة ومحترمة مع أندية عالمية بحال بايرن ميونيخ ويوفنتوس الإيطالي، ودابا كيلعب مع فريق الدحيل القطري وكان اعتزل دوليا، حيث بقى فيه الحال بسبب تعليقات ومقالات صحافية كانت كتهاجمو ديما، ومع ذلك المؤسسة الخيرية اللي كان داير هادي سنوات، بقات خدامة وبنعطية باقي كيدير الخير.
