“حمزة مون بيبي”، الحساب الوهمي على سنابشات وإنستغرام، واللي كانت حرفتو هي يدير تصفية الحسابات مع الناس، واللي وقت ما كان عندو شي فضايح ولا أسرار على شي واحد كيمشي عندو ويعطيه، هاد الحساب كينشر بلا أي تحقيق شنو وصلو، وهاد الأيام من بعد ما راجت أخبار باللي تشد، واحد العدد ديال المشاهير والفنانين اللي كانوا كيشكروه، ومنهم اللي كيقول كيعرفو، دخلوا لقفص الاتهام. كيفاش؟
سلطانة وأول ظهور
“حمزة مون بيبي” هو حساب بان فـ2018 على سنابشات أول مرة، وكان كيهاجم واحد السيدة من مراكش سميتها سلطانة، وحط ليها صور خاصة ديالها ورسائل صوتية، ومن بعد مسير الحساب، أو مسيري الحساب، عجبهم هاد الشي وبقاو مكملين، تحت شعار “فاضحي المشاهير”.
وفداك الوقت سلطانة قالت باللي حسابها تقرصن، واتهمت الفنانة دنيا بطمة وختها وواحد صاحبتهم سميتها سكينة جناح، المعروفة بـ”كلامور”، ولكن كلامها كان بدون أدلة، وهو السبب اللي خلى مجموعة ديال المتتبعين يبقاو كيقولو باللي بطمة مورا الحساب.
دوك صمد والهجمات
من بعد سلطانة، بدا الهجوم على عبد الصمد بنعلا المعروف بـ”دوك صمد”، وكانت حملة تشويه عليه والاتهام ديالو باللي ماشي دكتور.
ومن ديك الساعة تهاجمهو ناس كثار فهاد الحساب من بينهم الفنان أحمد شوقي وليلى الحديوي وسلمى رشيد وغيرهم.
مريم سعيد أكبر ضحية
من أكثر الناس اللي تضررو بهاد الحساب كانت الإعلامية السابقة فقناة “إم بي سي”، مريم سعيد، من بعد ما نشر الحساب الوهمي صور خاصة ديالها وباسبور ديالها، اللي فيه باللي مشات للخليج على أساس أنها خادمة عند أمير سعودي.
وهاد الشي جا مباشرة مع خبر أنها غادي تتزوج، الشي اللي خلى المتتبعين ديال أخبار المشاهير على السوشل ميديا يقولو باللي الإعلامي سيمو بنبشير، واللي هو صديق خطيب مريم سعيد السابق، هو اللي رسل لحمزة مون بيبي هاد الشي، انتقاما منها، هاد الشي اللي سيمو بنبشير ما ردش عليه، لدرجة رجعو كيقولو شي وحدين باللي بنبشير هو مول الحساب!
ما بغاش يتفرق عليها.. “الحساب الشبح” يطارد مريم سعيد (صور)
مشاهير الويب والمدراء
من بعد هاد الحملات على الفنانين والمشاهير، حمزة مون بيبي بدا كيغير التوجه ديالو شوية، وبدا كيهاجم ناس آخرين، منهم مشاهير الويب، بحال يوسف الزروالي والمهدي منيار المعروف بـ”الأستاذ المعجزة”، وشي بنات كيبيعو الفيزا، ومدراء شي فنادق ورئيس المكتب الوطني لحقوق الإنسان في مراكش، هاد الشي اللي خلى عاوتاني المتابعين ديال “حمزة مون بيبي” يشوفو باللي الحساب رجع بشكل كلي خاص بتصفية الحسابات وماشي خاص بأخبار المشاهير، كيف كيدير حساب “شرطة المشاهير” اللبناني مثلا.
سعيدة شرف النقطة التي أفاضت الكأس
في آخر حلقات مسلسل “حمزة مون بيبي” دار هجوم على الفنانة سعيدة شرف واتهمها اتهامات خطيرة، وكيقول عليها انفصالية وكيطعن فالوطنية ديالها، وهاد الشي خلى بزاف ديال الناس يتعاطفو مع سعيدة شرف وبداو كيهاجموه.
ومن بعد تم اختراق حساب سعيدة شرف وتحطو محادثات مفبركة ضدها، وضد واحد الصديق ديالها، الشي اللي خلى هاد الثنائي يشك فواحد الهاكر معروف على مواقع التواصل الاجتماعي.
هاكر تشد وناس فالتحقيق!
وحسب مصادر مطلعة، واحد الدري من أكادير كان كيدير هاكر ديال الحسابات على السوشل ميديا ومعروف باللي كيرجع للفنانين الحسابات ديالهم، شدوه البوليس كيحققو معاه.
وحتى سكينة كلامور اعترفت ففيديو فالحساب ديالها على سنابشات أنها عيطو ليها للتحقيق فمراكش، وكتبات مواقع إخبارية باللي ناس آخرين حتى هما دازو فالتحقيق.
من جهة أخرى، مصادر أمنية ما بغاتش تكشف على أي معطيات فهذا الموضوع احتراما لسرية الأبحاث، ولكن أكدت أن التحقيقات خدامة وكاينين معطيات كثيرة.
بطمة وراجلها كيقولو ما عندنا علاقة
الفنانة دنيا بطمة ورجلها محمد ترك، دارو لبارح الثلاثاء (3 شتنبر)، لايفات فإنستغرام كيقولو باللي ما عندهم علاقة مع “حمزة مون بيبي”، وباللي كاع الأخبار اللي كتقول باللي بطمة دازت فالتحقيق غير “إشاعات وكذوب”، ومحاولة لتشويه السمعة ديالها لا غير.
