محمد المبارك
يلجأ العديد من اليوتوبرز المغاربة إلى إضفاء القليل من الفكاهة والهزل لإيصال المعلومة، باش يجيبو مشاهدين أكثر.
نجيب المختاري مهندس مغربي ومدوّن ومنتج فيديوهات في تبسيط العلوم، اختار طريقة كلاسيكية لتقديم الفيديوهات ديالو على يوتيوب، احتراما للقيمة العلمية اللي كيقدمها فالقناة ديالو اللي وصلات دابا أزيد من 67 ألف متابع، ومليون مشاهدة.
نجيب المختاري ثلاثيني تزاد في طنجة، تخصص في الرياضيات والفيزياء، ومن بعد مشا كمل قرايتو في فرنسا، وتخرج مهندس في الاتصالات والتكنولوجيا الرقمية.
وكانت أول تجربة عمل ديالو في مكتب أمريكي للبحث والتطوير التكنولوجي، وتما طور تقنيات الأداء برقم الهاتف، وصاوب مضاد فيروسات للحواسيب وشد عليه براءة اختراع، ومن بعد دار برنامج للتعرف الآلي على الصوت والوجه والبصمات.
وكان من بين مصممي نظام التعرف على البصمة الحيوية اللي استعملوه في الهند لتوزيع المساعدات الاجتماعية على الفقراء، وحتى اللي داروه في البوابات الأوتوماتيكية لعبور الحدود في مطار سكيپول بأمستردام، وكيدير محاضرات في تبسيط العلوم في الجامعات المغربية، وكان ضيف للعديد من القنوات الإذاعية والتلفزية المغربية والعربية، وشارك في لجان تحكيم مسابقات علمية شبابية، مثل مسابقة السباق إلى الفضاء الوطنية من أجل أخذ طلبة مغاربة إلى مخيم فضاء في وكالة “ناسا”.
أما بالنسبة لنجيب المختاري في عالم اليوتيوب، فالمهندس الطنجاوي ممكن يكون عندو أقدم قناة يوتيوب في المغرب، حيث تم الإنشاء ديالها سنة 2006، ولكن ما كانش كينشر فيها إلا بعض الفيديوهات من حفلات أو موسيقى عجباتو.
من بعد، وفي سنة 2015، قرر ينشر فيها فيديوات لتبسيط العلوم بالدارجة. وكان اختيار الدارجة بسبب أن الهدف ديال نجيب هو يشرح للمغاربة العلوم بطريقة بسيطة، لأنه شاف هاد الأمثلة في دول أخرى، بحكم أنه عاش فعدد من الدول بسبب العمل ديالو.
وكان أول فيديو ديالو فيوتيوب، يتعلق بالرد العلمي حول قولة أحد الشيوخ أن الأرض ثابتة، فيديو اللي لقى استحسان عند المتابعين ووصل لأزيد من ربع مليون مشاهدة، ثم انطلقت مسيرة مبسط العلوم على يوتيوب، ونشر فيديوهات كثار، واللي كانت في الغالب لا تتجاوز 100 ألف مشاهدة، رغم المحتوى العلمي ديالها، نشأة الإنسان، دورة الحياة، والعديد من المواضيع ليتم شرحها بطريقة علمية مبسطة جدا، ما أثار جدلا سنة 2017، وبداو رواد مواقع التواصل الاجتماعي كيديرو مقارنات بين نجيب المختاري ويوتوبرز آخرين، وعلاش هما كيوصلو لهاد الأرقام ونجيب لا، ومع ذلك هاد الشي ما خلاش نجيب يتوقف، وإنما رجع كينشر على الفايس بوك حتى هو تدوينات في نفس المجال اللي هو تبسيط العلوم.
من جهة أخرى، فاز نجيب المختاري بجائزة شخصية السنة في النسخة الثامنة لمسابقة “ماروك ويب أوارد” كأفضل المحتويات على شبكة الويب المغربي، وكذلك هو عازف جيد للآلة العود والقانون.
