مريم الزاكي
نشر الفنان الكويدي إيكو صورة حديثة مع أصدقائه من داخل الحمام.
وحكى إيكو، في تعليق ساخر على صورته رفقة أبناء حيه وأصدقائه، عن تفاصيل الذهاب إلى الحمام قائلا: “مابيا ما عليا حتا بديت نحك فجنابي، قلبت القاميجة ولقيت الكحولية فالكمام، قلت ما تكون غير شي تحميمة ونضت جمعت ليها قبابي، ومنين غادي غادي ندوز عند الحجام، جمعت ولاد الدرب وقلت ليهوم يالاه نتحمحمو يا صحابي، غير قنط نمشي بوحدي جريتهوم هاد الشي اللي عطا الله والصلاة على النبي، قلت ليهوم غير زيدو أنا نخلص لا تقولو سقرام، واللي حك ليه شي كسال منو ليه أنا غير الصابون البلدي اللي على حسابي”.
وأضاف بسخرية: “دخلنا وعطيت الرزمة لمول الحمام وقلت ليه حضي ليا معاك جيابي، لقيناه سخون معطر ودايزو الكلام، ها اللي كيتزلق ها اللي تيغني ها اللي مشبح فالسخون تيكمد الركابي، شويا كتر الرواج وبدا الزحام والمخاصمة على القباب والسبان بقلت الترابي، أنا مقدرت نسمع هاد الكلام وزاد كملها الما برد فالجعابي، والمسكين هوا مول الفرناتشي كلا نهار مصبح على جهنام، الله يرحم ليك الواليدين وآخر دعوانا الحمد للله وصلاة على الحبيب النبي”.
