هاد الشي ديال الرقية والفضايح اللي معاه، غير غادي وكيزيد، هاد السيمانة جونضارم شدو واحد الراقي نواحي القنيطرة، مع جوج كليانات ديالو سكرانين فالطوموبيل، من بعد دارو كسيدة فالطريق، ولبارح الثلاثاء (27 غشت)، جوج رقاة مضاربين وسط واحد الدرب فالعاصمة العلمية فاس.
الصداع اللي وقع بين هاد جوج رقاة رون الدرب، والناس بدات كتصور وكتقول “شوفو الرقاة مضاربين”، فمنظر خايب كيسيء للعاصمة العلمية وناسها.
واحد الراقي فهادو اللي كانو مضاربين سميتو ي.، قال فاتصال مع موقع “كيفاش” باللي المضاربة ما كانتش بسبب الكليان، وإنما الراقي لاخور جا ضرب ليه الأم ديالو، وهي اللي كانت معاهم فالفيديو.
حسب أحد جيران الرقاة بجوج، كاين واحد النزاع ومنافسة بيناتهم حيث بجوجهم فنفس الدرب، وكل واحد كيبغي يكون هو “راقي الحي”.
هاد فضايح الرقاة ماشي أول مرة، فالأول ديال العام بان واحد تعرف ب”الراقي البركاني” خرج فيديو ديالو كيدير علاقة جنسية مع كليانة، وقبل عامين واحد من أشهر الرقاة اللي هو الراقي مصعب تشد بجريمة الاغتصاب، من بعد ما رفعات واحد الكليانة ديالو شكاية ضدو.
بزاف ديال التخربيق والمشاكل، وناس خدامة بلا رخصة وبلا قانون، اللي حفات ليه الجرية كيرجع راقي، حتى رجعو كثر من المرضى، ومن جهة أخرى الأطباء النفسيين فالمغرب ما كيوصلهم حد، بحال إلى هاد الجنون مساليين ما لقاو غير المغاربة يسكونهم!
