“رونار مدرب فاشل” “رونار خصو يمشي بحالو” “مدرب غير نزيه وكيدير الخواطر” هادو شوية من بزاف ديال الانتقادات اللي نزلات على الناخب الوطني هيرفي رونار، اللي تحول فظرف ساعتين من أفضل مدرب في إفريقيا إلى أفشل مدرب على مر التاريخ.
إنجازات رونار تتحدث
المدرب الفرنسي كنتي كتبغيه ولا كتكرهو فهو قدم للكرة المغربية بزاف، يكفي نعرفو أنه أهل أسود الأطلس لكأس العالم من بعد 20 عام ديال الغياب، وقدر يفك بزاف ديال العقد التاريخية، من بينها الفوز على الكاميرون وجنوب إفريقيا وتجاوز دور المجموعات في الكان، اللي صعاب على المغرب من سنة 2004، والمنتخب المغربي سوا ما كيتأهلش أو كيتقصى فدور المجموعات.
حتال سنة 2017 مع رونار قدر المنتخب يفوت دور المجموعات، ونزيدو عليها أن المغرب كان في المركز 80 عالميا و19 إفريقيا قبل رونار ودابا هو فالمركز 47 عالميا والرابع في إفريقيا.
الإصرار والعناد
ما غاديش نطبلو لرونار ولا نقولو ما عندوش أخطاء، ولكن خاصنا نعطو “لكل ذي حق حقه”، فالفلسلفة ديالو اللي طلعات المنتخب هي نفسها اللي كلفاتو الخروج من “الكان 2019″، وهي الثقة ديالو الزايدة فبعض اللاعبين و”العناد” ديالو، كيف سبق وقلنا فموقع “كيفاش” باللي رونار كان شايف حكيم زياش ماشي فالمستوى ديالو ومع ذلك بقى مصر يدخلو أساسي فكل مقابلة، ونزيدو عليها البقاء ديالو على نفس طريقة اللعب مع جميع المنافسين، الشيء اللي خلا اللعب ديالو معروف ومحفوظ وسهل على المنافسين التعامل معاه.
صداع في رأس لقجع!
دابا أكبر موضوع عليه النقاش هو رحيل رونار، اللي عندو عقد حتال 2021 مع الجامعة الملكية المغربية لكرة القدم، والمنتخب أغلب العناصر ديالو غادي تعتزل، يعني فجميع الأحوال غادي يكون بناء من جديد، سوا بقى رونار ولا مشا، هكاك علاش إيلا كان شي واحد مبرزط دابا، فماشي الشارع المغربي ولكن فوزي لقجع اللي غادي ياخذ أصعب قرار من نهار شد الجامعة، حيت إيلا بقا رونار الأسماء اللي غادي تبقى هو اللي عيط ليها، وغادي يحتاج غير يزيد عليها أسماء جديدة، وإيلا جا مدرب جديد، يقدر يكون ما مقتنعش بنفس الأسماء وغادي يحتاج أسماء جديدة، يعني بداية من الصفر.
قرار رونار
هيرفي رونار لحد الآن ما بغاش يعطي راس الخيط، وقال فالتصريح ديالو باللي غادي يهضر فاش يرجع للمغرب، والقرار غادي يكون يرضي جميع الأطراف، مع العلم أنه فهاد “الكان” ما حققش الهدف واللي كان الوصول على الأقل لنصف النهاية.
