زيد كروش، لاعب فريق المغرب التطواني، عطا القاصح للحكم اللي قاد المباراة مع الوداد، واتهمو بأنه كان مع الوداد وبغاها تربح. كيفاش؟
لاعب فريق المغرب التطواني قال، في تصريح للموقع الرسمي للنادي: “كنعتذر لجمهور المغرب التطواني، ولكن الحكم راه ما بغاناش نربحو، راه تعدّى علينا بسبب القرارات ديالو، حيّد لينا 2 ضربات الجزاء”.
وأضاف زيد كروش: “كون جا عدنا الحكم وقال لينا بغيت الوداد تربح كون ما جيناش نلعبو من الأول ونخليو الفريق الأحمر يربح، مع احترماتي للوداد”.
وأضاف: “هاد الأغلاط ديال الحكام خلات الكرة الوطنية ما تزيدش القدام”.
يشار إلى أن الوداد فاز على المغرب التطواني بهدفين لواحد، لحساب منافسات البطولة الوطنية.
