ديما كنسمعو ناس جازاهم القدر على حسن النية ديالهم، من بعد ما تخلى عليهم أقرب الناس، ولكن قليل فاش كنسمعو قصة حقيقية بهاد النهاية. الإنجليزية ريونا كيلي مثال حي لهاد القصة. كيفاش؟
شلل وزوج هارب
هاد السيدة كترجع القصة ديالها لسنة 2015، فاش جاتها سكتة دماغية خلاتها مشللة وما قادراش توقف ما زال، والزوج ديالها داك الوقت فاش عرف بالمرض ديالها طلقها من مورا 5 أيام وخلاها مع 4 أولاد، ومن بعد 14 عام ديال الزواج.
مرض ومعاناة
الأطباء قالوا لكيلي أنها ما غاديش تقدر تمشى ما زال، وأن مسألة الوقوف خاصها عناية، حيث الإصابة ديالها في العمود الفقري وصعيب تتعالج.
فهاد الوقت كانت أم الأبناء الأربعة محتاجة لشي سند توقف عليه، وشي واحد يوقف معاها في المحنة، ولكن زوجها اللي دوزات معاه 14 سنة خلاها وفرط فيها وما قدرش الحالة ديالها.
الفايس بوك ومقاومة المرض
وحيث هاد السيدة عندها شخصية قوية حتى مع المرض، قررت تتحدى كلام الأطباء وتلقى طريقة تتعالج بيها، دارت إعلان في الفايس بوك كتقلب على مدرب شخصي يعاونها باش تعالج، وتما تعرفات على لاعب دوري الركبي السابق كيث ماسون.
قصة حب عظيمة
من بعد سنة بين لاعب الركبي والمريضة اللي تكلف بالمساعدة ديالها، كيث مايسون طلب من ريونا كيلي يدخل معاها في علاقة حب جادة، وقال ليها باللي لقى راسو كيبغيها ومتعلق بيها. وهي من جهتها نفس الشيء، لقات فيه الرجل اللي وقف بجنبها فاش زوجها والأب ديال أولادها تخلى عليها، ومن داك الوقت وهما كينشرو صورهم على إنستغرام وعندهم الآلاف المتابعين.
رد الزوج السابق
من بعد ما انتشرت القصة ديال السيدة كيلي، بعض وسائل الإعلام مشات سولات الزوج السابق واللي قال باللي كان ناوي الطلاق قبل ما يوقع ليها الشلل، وباللي هداك كان قرار نهائي خداه من قبل، وبأنه كان كيزور ولادو.
