قيّم المحلل الرياضي، فؤاد الصحابي، أداء المنتخب الوطني المغربي قبل مواجهة منتخب مالاوي، مساء اليوم الثلاثاء (25 يناير)، برسم دور ثمن نهائي بطولة كأس أمم إفريقيا المقامة حاليا في الكاميرون.
وكشف الصحابي في تصريح لموقع “كيفاش”، نقاط قوة وضعف المنتخب الوطني المغربي، قائلا: “من بين نقاط القوة ديال المنتخب اليوم، هو أنه كاين التزام كبير من الناحية الدفاعية، فبمجرد ضياع الكرة كنلقاو أن المهاجمين هم أول من يتحولو باش يديرو شبكة دفاعية، ويدافعو ويضغطو على المدافعين باش ما يخرجوش كرات سهلة وكيرجعو أحيانا للأجنحة الوسط مع الثلاثة اللي كاينين كيوليو جدار فيه 5 لاعبين، وكيبقاو كيدافعو ومحترمين الأدوار الدفاعية ديالهم في انتظار يجي الفرج ويجي الهدف”.
وأضاف “المنتخب غادي يسايرو المباراة بتأني، وأكيد أن التسجيل المبكر غادي يخرج المنتخب المالاوي من الدفاع والتقوقع ديالو، باش يخرج يلعب الكرة ويقلب على التعادل، حيت كيعرف أن اليوم ما بقاش دور المجموعات ما يمكنش دوز بانتصار على زيمبابوي وتعادل مع السنغال، هادي مباراة فاصلة وخاصها تربح ربما يلا خرج غادي يبقاو فراغات نقدرو نستغلوها”.
وبخصوص نقط ضعف الأسود، قال المحلل الرياضي إن “التخوف الوحيد ديالي هو أن المنتخب الوطني أحيانا كيضيع شوط… مثلا في المباراة الأولى أمام غانا ضيع شوط، وفي المباراة الآخيرة ضيع شوط عاد استدرك الوضع فالشوط الثاني”.
وتابع “الإشكال الثاني هو أننا كنخلقو مجموعة من الفرص وكنضيعوها… أحيانا تضيع بغرابة، أحيانا تضيع بسبب التسرع، أحيانا تضيع بأن لاعبين يالاه دخلو جداد وما زال ما داروش مع الفريق”.
وواصل حديثه بالقول “نتمنى أننا نحاولو نسجلو الأهداف والفرص اللي كتيح لينا، لأن كرة القدم تقدر ضيع مجموعة من الأهداف، ويجيك هدف مباغث وكنتمنى على أن هاد المباراة ما غتكونش سهلة، وفنفس الوقت ما غتكونش صعيبة اللعابة ديالنا هما اللي غادي يسهلوها يلا بغاو بالسرعة، بالاختراق، بالتركيز، أمام المرمى باش نحسمو ان شاء الله اللقاء”.
يذكر أن المنتخب الوطني سيواجه مساء اليوم الثلاثاء، منتخب مالاوي، على أرضية ملعب أحمدو أهيدجو في الساعة الثامنة مساء.
إقرأ أيضا: الصحابي: حنا مرشحين للفوز على مالاوي ولكن حذاري من الضربات الثابتة (فيديو)