من بعد “زعزع” المغربي اللي عطاه الرابور توفيق حازب، المعروف ب”البيغ”، بعنوان “170 كغ”، وهاجم فيه أغلب “الروابة” ديال المغرب اللي باينين دابا فالساحة الفنية، واحد المجموعة من “ضحايا البيغ” ما زال ساكتين، وما قدروش يخرجوا “تراك” يجاوبوا، على عكس “مستر كرايزي” و”حليوة” اللي نشروا “تراكات”.
إقرأ أيضا :
“كومي” دار ستوري وغبر
الرابور “كومي”، من بعد ما سمع “170 كج” ديال “البيغ”، حط ستوري فإنستغرام، كيبان فيها هاز 180 كيلوغرام فالقاعة الرياضية، ردا على “البيغ”. ومن بعد ما عاودش جبد الموضوع، رغم الطلبات العديدة من متابعيه باش يرد عليه.
“طوطو” دار فيها حكم
مغني الراب “طوطو”، من بعد ما سمع “التراك”، حط ستوريات كثار على إنستغرام، ودار راسو بحال يلا ما كانش مقصود فهاد “الكلاش” ديال “البيغ”.
وبدا كيعطي تعليقات وكيقول “مزيان هاد الشي، حركوا القضية”. ومن بعد دار راسو محلل وبدا كيقول باللي “البيغ” دخل للبعض الأشخاص فحياتهم الشخصية.
وفاش خرج “حليوة” رد على “البيغ”، خرج “طوطو” كيقول باللي كان كيتسنى شي حاجة أحسن من هاد الرد.
إقرأ أيضا :
من جهة أخرى، متابعو “طوطو” كيسولوه علاش ما جاوبش ودار راسو غير معني بالأمر، مع أن الرسائل اللي كانت موجهة ليه من طرف “البيغ” كانت واضحة.
“لبنج” بغا يضارب
“لبنج” ما جاوبش حتى للبارح الثلاثاء (25 دجنبر)، وحط ستوري على إنستغرام كيقول فيها باللي ما غاديش يجاوب على إنستغرام وإنما غادي يضربوا نهار يتلاقى معاه فالزنقة.
“ديزي دروس” داير راسو ما على بالوش
“ديزي دروس”، أكثر واحد تكلاشا ف”التراك”، كان كتب على إنستغرام باللي “البيغ” حاول يستغل اسمو باش يجيب مشاهدات. ومن بعد ما كتب “في طور الإنجاز” أغلب متابعي موسيقى الراب اعتقدوا باللي “ديزي دروس” كيوجد الرد على “البيغ”.
ولكن البارح “ديزي دروس” كتب على إنستغرام ديالو تدوينة فيها إشارة إلى أنه محال غادي يجاوب وكتب فيها: “فيقوني ملي يساليو”.
