فاش كيكون الواحد كل سيمانة كيسمع عملية إرهابية فشي دولة، وهو مرتاح فدارو وما خايفش على راسو خاصو يحمد الله على الأمان اللي كيعيش فيه فبلادو، ماشي ينوض يشكك ويقول تفكيك الخلايا الإرهابية ما كايناش، وهاد الشي غير مسرحيات.
صباح اليوم الاثنين (5 أكتوبر)، المكتب المركزي للأبحاث القضائية، فكك خلية إرهابية موالية لتنظيم “داعش” فنواحي طنجة، فيها أربعة ديال أشخاص عمرهم ما بين 23 و26 سنة، منهم المشتبه فيه الرئيسي اللي هو أمير الخلية وثلاثة آخرين أعضاء فهاد الخلية الإرهابية.
هاد الخبر اللي توثق بالصوت والصورة من عين المكان، ولقاو رمز داعش مرسوم فحيط، وحتى فيديو البيعة اللي صيفطوه المتهمين للزعيم ديالهم، ما كانش كافي باش يقنع واحد الفئة اللي ديما كتشكك فكل الشي وكتخرج تقول هاد الشي مؤامرة وما كاينش.
عاجل – بالصور والفيديو من طنجة.. تفكيك خلية إرهابية واعتقال 4 أشخاص
واش هاد الناس بغاو حتى توقع شي مصيبة عاد يثيقو؟ واش ما كفاهمش شنو كيوقع فدول غير قريبة لينا بسبب هاد المتطرفين؟ واش كيسحابو المغرب حالة استثنائية ولا يمكن المتطرفين يدورو بيه؟
هاد المرة فقضية عوامة كان واحد الاختلاف كبير، هو مرات والعائلة ديال المتهم الرئيسي ما خرجوش كيديرو كيف بزاف ديال الحالات، اللي العائلة كتنكر أو كدير المظلومية، وإنما هاد العائلة كانت أكثر شجاعة وخرجات فتصريحات صحافية كتأكد أن ولدهم تبدل بزاف وفرض على مراتو الخمار وبدا كيهددهم وكفرهم، حيث ما كيصلوش، بل وصلات به يقول للأم ديالو “أنا ما غاديش نمشي فالجنازة ديالك”.
مسخوط والديه وكان كيقول ليهم نتوما مرتدين.. معلومات عن “زعيم خلية العوامة” (فيديو)
