هاد الشي اللي كيوقع كيخلي الواحد يفقد الدماغ ديالو، ماشي غير الثقة فالنخب وصافي.
دابا غير فهاد الشي ديال الدستور، هادي عاماين تقريبا وحنا كنسمعو الهضرة ديال تنزيل الدستور تنزيل الدستور، وملي ما قدرناش نديرو التنزيل ولينا نديرو تنزيل الباطل. هادي لجنة فوسط لجنة، تشاورات مع واحد لجنة باش تقول للجنة اللي كاينة لهيه باللي اللجنة اللي كانت لهيه مشات ولقات اللجنة مجتمعة وقالت ليها يا اللجنة فين هي اللجنة… وسير تضيم مع هاد الشي، واللي فهم شي حاجة يربح معانا.
أما واحد السي بوانو، الشاف ديال البرلمانيين ديال البيجيدي، فبوحدو، غير يكون ناعس ويفيق يقول لينا، ولا ليهم: والله حتى ننزلو للشارع. فين غاديين بهاد الشي؟ شي باغي ينزل للشارع، شي باغي يطلع للجبل… وشي غادي يطلع ليه الزعاف كاع.
إيوا ملي توصل الانتخابات قولو المغاربة ما بغاوش يصوتو. راه والله حتى يصوتوكم غير بقاو عليهم بهاد الهضرة.
وتوما نوضو تخدمو باراكا من النكير.
تشاو تشاو.
