سمحو لي يا وليداتي غبرت عليكم هاد الأيام. غادي تسولوني علاش؟ ماشي مرض، ماشي سفر، ماشي كآبة. غير وكان اللوجيسيل ديالي ما بقاش مقاد.
كيف كتعرفو يا وليداتي الكارطة هو كلشي فالخدمة ديالي، ولكن هاد الأيام ما بقات نافعة فوالو، وما بقات شادة حتى والو فهاد الشي اللي واقع فالبلاد.
الجواد اللي كنخدم معاهم حتى هوما ما بقاو مقشبلين والو. نجي نقرا الخط لشي واحد كيبان لي غير الطشاش. وشي سمسات غير كنذكرهم كنسمع تيت تيت تيت تيت.
بيني وبينكم ندمت علاش جيت لهاد الضومين. بكري كنت خدامة غير فالزواج والطلاق والمحبة والكره والعكس والثقاف والتجارة، وكان ربي كيجيب التيسير والغرض كيتقضى، ولكن درتها لراسي ملي قلت نمشي ندير البوليتيك. أنا اللي غرني هو سمعت على العفاريت اللي دخلو للسياسة، وقلت أنا دواهم، وكلشي نعيق بيه، ولكن الريزو ما بقاش كيشد، حيت ترونات مزيان. واش الجواد اللي كانو كيخدمو معايا فالمحبة بين الرجل والمرا وليت نسولهم على صندوق المقاصة؟ شي نهار يدعيوني حيتاش هاد الشي ما درتوش معاهم فالكونطرا ديال الخدمة.
خليت ليكم الخير.
