أخصائيّ في الأمراض المُعدية: المُسنّين غادي نبداو ليهم العلاج قبل ما تبان النتائج

في توضيحاته حول البروتوكول العلاجي المُحيّن لفيروس كورونا في المغرب، قال البروفيسور شكيب عبد الفتاح الأخصائي في الأمراض المُعدية والتعفنية في المستشفى الجامعي إبن رشد في الدار البيضاء،: “جميع الحالات غادي تتعالج، سوا عندها أعراض أو ما عندهاش، ولكن الحالات اللّي غادي تكون مُحتملة وكا تعاني من مرض مُزمن أو سنّ متقدم، هادي غادي نبداو ليها العلاج بالأدوية قبل ما تبانْ النّتيجة”.

وفي تفسيره لأسباب العلاج الفوري قبل ظهور النتائج، قال البروفيسور شكيب عبد الفتاح، “غادي نبداوه باش نتفاداو عواقب تأخر التشخيص، وباش الفيروس ما يزيدش ينتشر بين الناس”.

طُرق العلاج

وتابع البروفيسور الحديث عن مدة العلاج وما يميز البروتوكول الصحي بعد تحيينه بالقول: “الناس اللي ماعندهومش أعراض غادي نعطيوهم الدواء لمدة 9 أيام، وغادي يكونو كيتعالجو فالمنازل ديالهوم، ولكن خاصهوم يبقاو فالعزل الصحي فديورهم لمدة 14 يوم، أما الحالات اللي عندها أعراض، غادية تعالج لمدة 10 أيام، والعزل الصحي في 14 يوم كذلك، ولكن هاد الحالات يلا بقاو عندها أعراض بزاف، الطبيب يقدر يقرّر باش يزيدهوم 5 أيام ديال الدوا”.

الأدوية ما تبدلاتش

استرسل البروفيسور شكيب عبد الفتاح الأخصائي في الأمراض المُعدية والتعفنية في المستشفى الجامعي إبن رشد في الدار البيضاء، تفسيره للبروتوكول الصحي، “الحالات اللي ماعندهاش أعراض، أو أعراض طفيفة، وماعندها حتى شي مرض مزمن، وما عندهاش سن أكبر من 65 سنة، يلا برات مزيان، أما يلا تزاد عليها الحال ديك الساعة كاندخلوها للمستشفى”.

وحدد المسؤول أنواع الحالات التي تستدعي العلاج في المستشفى، خصوصا مع ارتفاع حالات الإصابة بكورونا،” الناس اللي كيدخلو للمستشفى هوما الناس اللي عندهوم مرض مزمن أو عندهوم أكثر من 65 سنة، الناس اللي عندهوم أعراض، والناس اللي عندهوم حالة حرجة”..