• بغاو يسمموه.. نجاة ترامب من محاولة اغتيال (صورة)
  • برلماني تفركع على وزير الصحة: شركات أدوية كتحلب ففلوس الشعب… وهاد الشي محال تقد عليه (فيديو)
  • بنحمزة ل”كيفاش”: استمرار منع صلاة الجمعة في زمن الجائحة يراعي صحة المواطنين
  • اللي نتسناو بركاتو.. إحالة فقيه إلى التحقيق بعض تورطه في الاستغلال الجنسي لقاصرات
  • هادي جديدة.. البشر قد ينقل كورونا إلى الحيوانات!
عاجل
الجمعة 02 أغسطس 2019 على الساعة 23:00

شهرة إنستغرام سلاح ذو حدين.. الشلواطي تدفع ضريبة مشاركة حياتها الخاصة!

شهرة إنستغرام سلاح ذو حدين.. الشلواطي تدفع ضريبة مشاركة حياتها الخاصة!

الشهرة على مواقع التواصل الاجتماعي وخاصة موقع إنستغرام، كتدخل لصحابها الفلوس، ويقدر يوصل إشهار بسيط فستوري لمدة 24 ساعة لمليون سنتيم، ولكن هاد الشهرة، هي سلاح ذو حدين، يقدر يجيب على مولاه المشاكل. كيفاش؟

أغلب مشاهير إنستغرام واخا يكون مجال العمل ديالهم مختلف، كيلقاو راسهم مفروض عليهم يشاركو حياتهم الخاصة مع المتابعين ديالهم، وكاع الأخبار ديالهم، وحتى يلا ما شاركوش أخبارهم، المشهور الإنستغرامي خاصو يجاوب على الشائعات اللي كيتقالو عليه.

اليوم الجمعة (2 غشت)، العارضة المغربية شروق الشلواطي حطات ستوري كتلمح فيها لمشكل مع رجلها، من بعد ما رواد الموقع المذكور، نشرو صور لرجلها العراقي مع بنت أخرى، وقالو باللي كيخونها.

هاد الموضوع اللي خاص بالزوجين فقط والمحيط العائلي ديالهم، رجع موضوع ديال الرأي العام والسبب أنه شروق الشلواطي نهار زواجها عرضت صور مع زوجها، ومن بعد خرج فتصريحات فمواقع مغربية، الشيء اللي خلا المتابعين يعرفوه الهوية ديالو والشكل ديالو. 

شي سيمانة تقريبا، شروق الشلواطي مسحات صورها مع الزوج ديالها من إنستغرام، هادشي اللي خلا المتابعين يبقاو يبقششو واش كاين مشكل بين الشلواطي ورجلها العراقي، حتى لقاو قبل يومين، صور ديال رجلها مصطفى النعيمي مع بنت مغربية عايشة فالإمارات على نفس الموقع، وانتشرو الصور بشكل كبير.

ووحسب مصادر مقربة من العارضة المغربية فهي براسها ما ساقت الخبار حتى شافت الصور فإنستغرام، والشلواطي لحد الآن باقا مع رجلها.

هاد المشكل ديال ملكة جمال العرب سابقا، في الحالات العادية كيتحل في المحاكم ولكن العارضة المغربية دابا كتدفع ضريبة الشهرة ومشاركة الحياة الخاصة على مواقع التواصل الاجتماعي، حيث دابا العادي والبادي غادي يعطي الرأي ديالو فهاد الشي، وحيث كاينين متعاطفين معاها وناس كتشفى فيها، غادي يعصاب على الثنائي يلقى حل للصلح، حيث القضية ما بقاتش ديالهم بوحدهم وإنما ديال أي واحد ساق الخبار وعطى رأيو، كيفما كانت النتيجة ديال هادشي غادي تسمع انتقادات من متابعيها.