“ما كيماركيش”، “صاحب رونار”، “علاش كيدوه للمنتخب” هادو شوية من بزاف ديال الانتقادات اللي كتهاجم خالد بوطيب لاعب المنتخب الوطني، واللي مجموعة من الناس ما عاجبهمش، خاصة من بعد الموسم ديالو مع الزمالك المصري، واللي ما سجلش فيه عدد كبير ديال الأهداف.
الموسم مع الزمالك
هاد الانتقادات ضد بوطيب فيها جانب من الصواب، حيت مهاجم الزمالك هاد العام ماركا 4 ديال الأهداف ف11 مقابلة، وهادا رقم ضعيف مقارنة بأرقام مهاجم صريح.
لكن اللي خاص يتعرف هو أن خالد بوطيب انتقل للزمالك المصري شهر يناير اللي فات، وكان جاي من الدوري التركي اللي مختلف على الدوري المصري، وزيد عليها أن بوطيب دوز أكثر من 10 سنين وهو فالدوري الفرنسي، وتما فين تعرف.
وحاجة أخرى، خالد بوطيب تعرض لإصابات مع الزمالك ما خلاتوش يولف الأجواء المصرية، وزيد على هاد الشي هجوم الجماهير المصرية عليه، حيت كانو بغاو ولد بلادهم كهربا اللي يلعب وخايفين من بوطيب ياخذ ليه بلاصتو.
ماشي ماكينة أهداف ولكن!
يلا رجعنا لتاريخ خالد بوطيب فهو ماشي ماكينة أهداف، والأرقام ديالو في المسيرة ديالو عادية، وأحسن معدل عندو كان مع ستارسبورغ فاش سجل 20 هدف ف36 مباراة، بمعدل 55 فالمائة وهو معدل متوسط بالنسبة لرأس حربة.
ولكن يلا شفنا أهداف بوطيب فأغلبها أهداف حاسمة، وكتحتاج لبرودة دم قدام الشبكة، وأي واحد تابع بوطيب غادي يتفكر الهدف ديالو ضد إسبانيا في مونديال روسيا 2018 وأربعة أهداف حاسمة في إقصائيات المونديال.
حاجة أخرى، بوطيب واحد من اللاعبين اللي كيحل لصحابو اللعب، زائد عندو سجل محترم في التمريرات الأخيرة وصناعة الأهداف، بمعنى آخر خالد بوطيب كيلعب لمصلحة الفريق وماشي باش يتسمى هو بطل الفريق.
بوطيب وكيتش آب
يلا كان الحكم على خالد بوطيب من الموسم ديالو مع الزمالك، فهاد الحكم ظالم بزاف، حيت نفس الحاجة وقعات مع الأرجنتيني غونزالو هيغواين قبل 13 سنة في ريال مدريد، فاش جا كان عندو مشكل فالأهداف وما كانش كيسجل بزاف، ومن بعد فاش لقى طريق الشبكة ورجع هداف الفريق، قال لصحيفة “ماركا” الإسبانية باللي “اللاعب الهولندي فان نيستروي كان قاليه باللي الأهداف بحال كيتشوب، كتبقى تحاول تخرجها ولكن ما كتخرجش، وفاش كتخرج كتكون كثيرة”.
وهاد الشي نفسو اللي وقع مع خالد بوطيب فالمنتخب، فمن نهار لعب مع الأسود ما عمرو ماركا حتى سجل ضد مالي فإقصائيات المونديال، وبعدو مباشرة سجل ثلاثية في مرمى الغابون.
لاعب يخدم الفريق وصاحب روح عالية
من المعلومات اللي معروفة على مهاجم الأسود أن بوطيب من اللاعبين القلال اللي ما دازوش من مراكز التكوين، وكان عندو مشكل في أساسيات كرة القدم، هاد الشي كان هضر عليه اللاعب الفرنسي جيريمي ستروفالدي اللي لعب مع بوطيب 4 سنين ففريق أوزيس الفرنسي في الدرجة الثانية.
وجيريمي أكد باللي “بوطيب فاش جا فالأول كان لاعب عادي بزاف، وأي واحد يشوفو يعرفو باللي ما دازش من مركز تكوين ولكن من بعد 4 سنين اللاعب تغير وتطور بشكل كبير ورجع هداف الفريق، وهاد الشي اللي خلا أندية تبغي تستفد من الخدمات ديالو”.
وقال اللاعب الفرنسي باللي بوطيب “كان محبوب عند لاعبي الفريق حيت كيضحي على التوني وكيعطي تمريرات لصحابو باش يسجلو”.
نفس الشيء قالو الفرنسي ميكائيل دياكوتا، اللي لعب مع خالد بوطيب ففريق لوزيناك الفرنسي، وقال باللي بوطيب “كان ديما قادر يسجل أكثر من 20 هدف ولكن كيبغي يعطي لصحابو فالفريق، وباللي هو واحد من أهم العناصر داخل وخارج الملعب حيث كيعطي لصحابو طاقة إيجابية بسبب الروح ديالو العالية”.
