المحامي محمد زيان من ديما وهو “مقطع الوراق” ولكن كل مرة كيجيب الجديد اللي ينسيك فالقديم. كيفاش؟
من بعد التصريحات ديالو اللي كانت غريبة وفيها مصطحات عجيبة بحال “زنطيطو” و”ديالو فيها طن ونص”، واللي تداولوها الفايسبوكيين قبل أيام، مؤخرا بان فيديو “جديد قديم” ديال زيان.
الفيديو كيبان فيه زيان جالس وسط جماعة ديال الفقها وحفظة القرآن قدام البرلمان، وكيقراو بعض الآيات الكريمة. الفيديو تم نشرو على موقع الفايس بوك تحت عنوان “فقهاء مع محمد زيان يقرؤون القرآن أمام البرلمان المغربي.. قالك آ سيدي راه مسكون والعلم لله”.
الفيديو المذكور قديم، وكيرجع لسنة 2011 وكيوثق لإحدى مظاهرات حركة 20 فبراير، اللي شاركوا فيه طلبة حملة القرآن، واللي تطفل عليهم زيان ومشا جلس وسطهم وبقى حتى هو يقرا القرآن وكيدير حركات غريبة بيديه، الشي اللي خلى زيان عاوتاني محط سخرية الفايسبوكيين.
أحد نشطاء الفايس بوك كتب في التعليق ديالو على الفيديو: “غيحلو بويا عمر غ على حسابو”. وكتب واحد آخر: “الحزب الليبرالي الإسلامي الشيوعي”. وقال ناشط آخر: “السطاج اللخر، ما عرفت راسي واش نبكي على القاع اللي ولينا فيه ولا نضحك”.
